වැස්ස… | 5% for SL-Charity

පායන කාලෙට අහන්න ආසම වචනේ තමා වැස්ස කියන්නේ. අදවත් වැස්සක් ලැබෙයිද කියලා බල බලා ඉන්නවා. එහෙම බලන් ඉදල ඉදලා වැස්සක් ලැබුනදාට හිතට ගතට දැනෙන සනීපේ ඉතින් කියලා වැඩක් නෑ. ඒ වගේම තමා මේකේ අනික් පැත්තත්. එක දිගටම දවස් ගනන් වහින්න ගත්තාමත් වැස්ස නවතින්නේ කවදද කියලා බල බල ඉන්නවා. අපේ අම්මානම් කියන්නේ වැස්ස තමයිලු මේ ලෝකේ වැඩිපුරම බැනුම් අහන්නේ කියලා. මොකද ඉතින් මිනිස්සු වැස්සත් බයිනවා. වැස්සේ නැතුවාමත් බනිනවා. බලන් ගියාම ඒ කතාවේ ඇත්තකුත් නෙත්තේම නෑ නේද..

කොහොම උනත් ඉතින් වහිනකොටත් පොඩි ගතියක් තියෙයි. මන්නම් ආසම දේ තමයි ගුලිවෙලා නිදාගන්න එක. තව උනු උනු රෝල්ස් එකක්, එළවළු රොටියක් වගේ දෙයක් එක්ක තේ එකක් බිබී film එකක් බලන එක. කෝ ඉතින් දැන් ඒකටවත් වේලාවක්. වැස්සක් නෙමෙයි ඉතින් ගැලුවත් දැන් ඉතින් job කරන්න ඕනේ. හැබැයි එක වාසනාවකට කියලා තියෙන්නේ ගෙදර ඉදන් job කරන්න පුලුවන් උනු එක තමයි. නැත්නම් මේ වැස්සේ බස් එකේ තෙරපි තෙරපි හොඳ ගානට තෙමිලා තෙමිලා වැඩට යන්න අමුතුවෙන්ම හිත හදාගන්නම වෙනවා.

මට මතක විදිහට නම් මේ අවුරුද්දේ ලොකුවට පායපු කාලයක් තිබුනේම නෑ. අවුරුද්ද පුරාම වැස්ස ලැබුනු අවුරුද්දක් තමයි 2021 කියන්නේ. එක දිගටම වහින මේ වැස්ස සමහර අයට ලොකු ගානක් නැති උනාට දවසේ පඩියට වැඩ කරන අයට තමා අමාරුම. හරියට ගෙයක් දොරක් නැතුව අසරන උනු අයත් අපි නොදන්නූවා උනාට කොතෙකුත් ඇති. මිනිස්සු වගේම තමා අසරන සත්තුත්. ගෙයක් දොරක් නැතුව, කන්න නැතුව, උනුහුමක් නැතුව පාලුවේ සීතලේ ගෙවෙන ජීවිතත් කොතෙකුත් ඇති. මේ වේලාවේ ඒ වගේ ජීවිතයක් ඇහැ ගටුනොත් නොදැක ගියා වගේ නොකර පුලුවන් උදව්වක් කරන්න පෙලබෙන්න පුලුවන් නම් නොසෑහෙන්න පිනක් අපි කාට කාටත් උරුම වේවි.

මටනම් දැන් හිතෙන්නේම දැන්නම් වැහි දෙයියනේ වැස්සා හොඳටම ඇති කියලා. ඉර එලියක් දකින්න, පොඩ්ඩක් වටේ පිටේ ඇවිදින් ආසාවේ බෑ. ඒ හැමදේටම වඩා ගොඩ ගැහිලා තියෙන ඇදුම් කන්ද වේලගන්න. ඇදුම් වලටත් වැල් වලම එල්ලිලා ඉදලා ඉදලා දැන්නම් එපා වෙලත් ඇති.