A relaxing day at the garden | Flowers

ඊයෙ රෑ ඉඳන් අද පාන්දර වෙනකල්ම ඇදවැටුන ලොකූ වැස්ස අද උදේ වෙද්දි නම් හොඳටම පායලා තිබුණා. ඒත් මම උදේ අවදි වෙද්දිත් අපේ ගෙදරට current තිබුණෙ නෑ. ඇඳෙන් නැගිටල වෙනද වගේම උදේ නැවුම් වාතය එක්ක හොඳ හුස්මක් ගන්න හිතාගෙන මිදුලට ආපු මට ඔය අතරින් ඇහුනෙ, අයහපත් කාලගුණය නිසා සිදු වුණ විදුලි බිඳ වැටීමක් සහ නැවත සකස් කිරීමට අද දවසම ගතවිය හැකි බව කියායෙන යන Announcement එකක්. හිත හදාගෙන මම මිදුල දිගේ වත්ත පැත්තට ඇවිදගෙන ගියේ් අද වත්තෙ වැඩ වලට තාත්තට උදව් කරනව කියල හිතාගෙන.

ඊයේ මුළු රෑම වැස්ස උනත්, ඒ වෙද්දිත් හොඳින් දීප්තිමත්ව පායල තිබුණ හිරුගෙ කිරණ අපේ වත්ත පිරෙන්න තියන උස ගස් අතරින් අපේ මිදුලෙ හැම තැනටම එබිකම්පාල තිබුණු නිසා මිදුලෙ කිසිම තැනකවත්, මගෙ අම්මගෙ මල් පාත්තිවලවත්, පිණි බිංදුවක්වත් ඉතුරු වෙලා තිබුණෙ නෑ. ඒත් ඇති පදම් විඳගත්තු වැස්සකට පස්සෙ හරිම සතුටින් පිබිදිලා ඉන්න නැවුම් ගස්, මල් පොදි, හිරු එළිය අතරින් උනත් හමාගෙන ගියපු ඒ සිහිල් සීතල සුළඟ, හුඟ කාලයක් තිස්සෙ අවිවේකීව නොසන්සුන් වෙලා තිබුණු මගේ මනසට පුදුමාකාර සැහැල්ලුවක්, සනීපයක් අරන් ආව. ඒක විඳින්නම ඕනෙ හැඟීමක්. අද දවසෙම විදුලිය නැති එකත් කොයි තරම් නම් හොඳයිද කියල මට හිතුණා.

වත්තෙ ඇවිදින අතරෙ ලස්සනට පිපිල තිබුණු මල් වල Photos ටිකකුත් අරගෙනම මම තාත්තගෙ වැඩ වලට උදව් කරන්න ගියා. ලස්සන උනත් නම් දන්නෙ නැති මල් වර්ග තමයි අපේ වත්තෙ තියෙන්නෙ.

මේ පැළෑටිය නම් අපේ ගෙදර තියන එකක් නෙමෙයි. මේ Photos ටික මම ගත්තෙ ගිය සතියෙ අපේ අක්කලගෙ ගෙදර ගියපු වෙලාවක. මේ ශාකය හොඳට සරුවට හැදෙන්නෙ ටිකක් තෙත ගතිය සහිත පරිසරයක. ඒ වගේම තමයි තරමක් හිරු එළිය වැටෙන, තරමක සෙවණ සහිත තැනක් තමයි වඩාත්ම සුදුසු වෙන්නෙ.

මේ පැළෑටිය හිටවල තියෙන්නෙ කලයක. කලයෙ සිදුරක් හදල, කලය ඇතුළට පැළෑටියට පොහොර වෙන්න අවශ්‍ය දේවල් දාලා, කලයට පිටින් පැළෑටිය තියල ලණුවකින් ගැටගහනව. පැළෑටිය කලයට මුල් ඇද්දට පසු ලණුව අයින් කරන්න පුළුවන්. මේ පැළෑටියෙත් නම නම් දන්නෙ නෑ, ඒත් ලස්සන ගෙවත්තක් තවත් ලස්සන කරන්න පුළුවන් විදියෙ ආකර්ෂණීය ශාකයක්.

මේ පැළෑටියෙ පත්‍ර වර්ග දෙකක් තියනවා, එකක් තමයි සාමාන්‍ය ශාකයක වගේ වැවෙන, දිගු, බෙදී විහිදුණු පත්‍ර. මේ ශාකය තරමක් විශේෂ වර්ගයක් කියල මට හිතෙන්න හේතුව තමයි අනෙන් පත්‍ර වර්ගය. ඒ, කලයේ පිටත පැත්ත වසාගෙන රවුමට වැවෙන පත්‍ර විශේෂය. මේ ශාකය කාලයක් තිස්සේ වර්ධනය වෙද්දි, එයට ආධාරකය වුනු කලය, නැත්නම් ලෑල්ලක් වගේ වෙනත් ආධාරකයක් උනත් රවුම් පත්‍ර වලින් වසාගනිමින් වර්ධනය වෙනවා.

මේ Photos ටිකත් මම එකතු කරගත්තෙ අක්කලගෙ ගෙදරදි. මේ මල ගැන නම් නොදන්න කෙනෙක් නැති තරම් නේ, Kandyan Dancer. මේ විදියට නම් කරන්න හේතුව මේ මල දැකපු සැනින්ම ඔයාලට හිතාගන්න පුළුවන් නේද? ඒ තමයි, මේ මලේ හැඩය හරියටම ශ්‍රී ලංකාවේ සාම්ප්‍රදායික උඩරට නර්තන ශිල්පියෙක්ගේ හැඩය ගන්නා නිසා.

නර්තන ශිල්පියාගේ හිස, ඔහුගේ අත් දෙක, ඔහු නර්තනයේ යෙදෙමින් ඉන්න අවස්ථාවක් නිරූපණය වන ඒ සාම්ප්‍රදායික ඇඳුම, මේ හැම දෙයක්ම හරියටම ඒ අයුරින්ම මේ මලේ පිහිටලා තියනවා.

Kandyan Dancer ඕකීඩ් (Orchid) වර්ගයක්. ශ්‍රී ලංකාවේ ප්‍රදේශ ගණනාවකම දැකගන්න පුළුවන්. විවිධ වර්ණවල Kandyan Dancer මල් තිබුණත්, අපිට බහුලවම දැකගන්න පුළුවන් සුලබම ප්‍රභේදයක් තමයි මේ කහ පාට මල්.

විශේෂ කිසිම සුවඳක් නැති මේ මල් වල, එක නටුවක කුඩා කුඩා මල් ගොඩාක් පිපෙනවා. සති දෙක තුනකටත් වඩා වැඩි කාලයක් මේ පිපුණු මල් ඉත්ත අපිට ගෙවත්තේ දැකගන්න පුළුවන්.

Thank you!
Best Regards!