Jeulamee

Jeulamee

Assalamualaikum saleum ulon bri
Saleum meuturi keu wareh dumna
nyang di banda atawa trueng campli
nyang di idi atau di buloh seuma

Nyoe na haba bahan diskusi
Syi neupuerati salah ngon beuna
Ta eue lawet nyoe wahe bang Ali
Kawoem lelaki susah lagoina

Di ek yum barang berkali-kali
Miseue yum campli dengon yum saka
Meunyoe atra nyan jeut tan ta paduli
Yum meueh hai akhi saket kepala

Saweub jeulamee lagee soet abi
Dak meu sitali geukureung hana
Peulom gampong lon sideh di sigli
Jeulamee dek ti meuhai lagoina

Goh lom peuneuwoe dengon khanduri
Tamah lom akhi keu asoe kama
Ulee teuh mumang ta kali-kali
Jeh lampoh campli sang payah peugala

Mari tapike cari solusi
Meunan keuh dali ngon realita
Bek na hambatan nyang dilalui
Muda ngon mudi meurumoh tangga

Timoh bak aron di pantak tari
Seukee meuriti di pasi rawa
Cinta bek putoh saweub inflasi
Saweub ngon Nabi rayeuk that desa

Mustafa Ibrahim Delima,
Anggota FAMe Chapter Pidie-Pidie Jaya