Kaugmaon by Engr. David Matthew Derit

Kaugmaon

Ang mga pulong sa atong bayani ning atong nasud nag.ingon,
Na ang mga kabatan.onan ang paglaom sa atong kaugmaon.
Kining mga pulong dili gayud malimod,
Sila ang pondasyon sa malig.ong kaugmaon.

Mga kabatan.onan nga may taas og paglantaw,
Para sa kaugmaong hapsay og malamboon.
Sa edukasyon og impormasyon sila nag.uhaw,
Aron maisogon nga musagubang sa pagsuway sa umaabot na panahon.

Mga kabatan.onan nga sama sa usa ka gamayng tanom,
Nga nanginahanglan og igong giya og saktong pondasyon.
Nanginahanglan sab sila og kanunayng pagtagad,
Aron ang ilang pagdako malipayun og mabungahon.

Mga kabatan.onan sa henerasyong utukan,
Nga nagtubo sa duyog sa lohika og agham.
Og matag adlaw nila kining giatubang,
Alang sa kaugmaong mahamugaway og maalam.

Mga kabatan.onan nga giisip ang ehemplo.
Ang mga saktong pagtulun.an sa tinood na pilipino.
Sa atong mga katiguwangan, kita murespito,
Sa mga panultihon sa atong ginikanan, atong gisunod og gituo.

Mga henerasyon nga karun nag.una,
Sa mga preskong pagtulun.an sa naga.usbong na siyensya.
Gikan sa kinailadmang dapit sa kadagatan,
Hangtod sa kinalay.ang bitoon sa kalunaan.

Sa pag.usbong niining bag.ong panahon,
Og sa pagtubo sa mga bag.ong henerasyon.
Mga kabatan.onan ang mga mahunahunaong paglaom,
Sa umaabot na hayahay og maalindogong kaugmaon.