La Tabulo Smeralda

Estas vere, senmensoge, certe kaj ja tute vere.

Tio malsupra estas kiel tio supra, kaj tio supra estas kiel tio malsupra; por fari la miraklojn de la Unu Afero.

Kaj kiel ĉiuj aferoj estis el Unu, per la mediacio de la Unu, tiel ĉiuj aferoj estis naskitaj el ĉi Unu Afero, per adaptiĝo.

Ĝia patro estas la suno, ĝia patrino estas la luno. Portis ĝin la vento en sia ventro, ĝia nutristino estas la tero.

Ĉi tie estas la patro de ĉiuj mirindaĵoj en la tuta mondo.

Ĝia povo estas kompleta, se ĝi estas turnita en teron.

Disigu la teron el la fajro, la subtilan el la densa, dolĉe, kun multe da lerteco.

Ĝi leviĝas de la tero ĝis la ĉielo, kaj denove malleviĝas ĝis la tero, kaj ricevas la povon supran kaj malsupran.

Tiel vi havos la gloron de la tuta mondo, kaj tiel fuĝos for de vi ĉia mallumo.

Ĉi tio estas la plej forta forto de ĉiuj fortoj: ĉar ĝi venkos ĉion subtilan kaj penetros ĉion solidan.

Tiel la mondo estis kreita.

El ĉi tio estos adaptiĝoj mirindaj, kies metodo estas ĉi tie.

Tial mi nomiĝas Hermeso Trismegisto, havanta la tri partojn de la filozofio de la tuta mondo.

Tio, kion mi diris pri la operacio de la suno estas kompleta.