Meureuno Teumuleh Lam Basa Aceh: Peu Phon

Aleh peu bala, malam nyoe tingat kuh keu sikrak haba nyang tom lon tuan deungo bak sidroe Profesor antropologi lua nanggroe. Geukheun le Profesor nyang nan gob nyan hana lon tingat le; "Keuneubah saboh-saboh nanggroe nyang paleng get na keuh asoe-asoe buku atawa asoe kitab-kitab nyang teutuleh ngon basa droe jih."

Meunan tingat keu sikrak haba nyan, meutingat keuh ulon tuan keu peukateuen geutanyoe uroe nyoe. Basa Aceh mantong ramee ureueng peugah haba. Teuma that-that jareung takalon ureueng nyang tem tuleh ngon basa Aceh. Adak pih na nyan cit tinggai bak ureueng tuleh-tuleh hikayat, nyan pih nyang tuleh-tuleh hikayat cit tinggai sidroe dua droe teuk nyang tuha-tuha.

Seulaen bah teumuleh hikayat, basa Aceh lagee-lagee hana teupakek sapat lam donya tuleh baca. Watee ta tanyong-tanyong bak ureueng lawet nyoe pakon ek sampoe meunan keunira, le nyang jaweueb meuseubab tuleh basa Aceh that-that sosah. Payah pakek tanda diakritik nyoe jeh ateuh saboh-saboh harah lagee basa Jerman, Denmark atawa padup-padup boh basa laen sideh di Eropa. Seubab nyan leubeh mangat teumuleh basa Indoneh.

Teudeungo alasan lagee nyan rupa, lon keudroe hana that ikap lam ulee. Beu payah that pih, teutap leupah bagah dikap lam utak ureueng-ureueng nyang rayeuk ngon udep lam basa droe. Teuma nyang jeut keu suai cit kon peu laen seulaen, sikula-sikula tanyoe nyang hana geu peureunoe teumuleh lam basa Aceh. Miseue na meubacut basa droe teuh nyoe dipeureunoe bak sikula, aneuk miet lawet nyoe ka pasti han buta that bak diteumuleh ngon basa droe pih seubataih ala kada.

Maka meu seubab sosah hatee keudroe ngon peu nyang ka geupeugah le Profesor jeh, lon meu useuha keuh di sinoe untok lon meureuno keulayi teumuleh lam basa Aceh. Adak pih golom that meuphom ngon tanda-tanda ateuh bareh, bah keuh hana lon pakek dilee tanda diakritik meutuwah nyan. Lom pih, ka lheuh lon seutot-seutot kiban cara ta teugon harah-harah bak keyboard beu diteubiet tanda diakritik nyan hana meureumpok sampoe 'an jula malam lagee nyoe rupa.

Nyoe lon mulayi aju keudroe teumuleh lam basa Aceh. Lon tre-tre teumuleh peukara peu mantong, nyang jeut keu saboh-saboh tulesan agak panyang nyang seulaen rupa hikayat. Lon kira, keu phon-phon that bah keuh meumada 'oh noe mantong nibak malam nyoe. Sabah ubee-bee raya ateuh gata-gata nyang ka neu tem peu abeh watee ngat jeut neubaca tulesan nyoe. Wassalamu.