Peukong Aqidah

Assalamualaikom ban bandum sahbat
Timu ngon barat nyang sa agama
Saboh i’tikeud sapeu ibadat
Umat Muhammad ban sigom donya

Haba ta deungo di Aceh Barat
Tanyoe seudeh that teuro ie mata
Dum ureung Aceh di Peumuruetad
Le kaphe laknat musoh Rabbana

Teuka troh keunoe si bulek barat
Ji ba jak intat saboh agama
Ji pura-pura peuduli rakyat
Tipee muslihat keu tanyoe dumna

Pakon jeut meunoe e wareh sahbat
Nanggroe syariat pakon jeut ka cuca
Pakon juet kaphe mudah meudarat
Pakon mudah that keunoe ji teuka

Ho ka ulama ho ka peujabat
Neupike siat pakiban cara
Kaphe neu yue woe keudeh u teumpat
Seugoh lom rakyat seumena-mena

Bek le tadeungo na ureung murtad
Peulom akibat di bri beulanja
karena gasien hudep meularat
meupaleng kiblat keudeh u Roma

Marikeuh jinoe dum rakan sahbat!
sunggoh ibadat ngat kong agama
Bek sampe tanyoe meutuka kiblat
Bek sampoe seusat hudep di donya

Mustafa Ibrahim Delima, Anggota FAMe Chapter Pidie Raya