Peureulèe Peungajaran Keu Sibeurangkasoë

Wajèb bagi sibeurangkasöe jak meununtut peungajaran. Peukeuh inông atawa agam, saban mandua. Ngôn na temuereunöe tatuóh tuléh baca, tatukri butoi salah, tatupat sigala banja. Peungajaran peuntèng beugi sibeurangkasöe, ngat uröe dudöe bek ceulaka. Jinöe cita baca syaé suai meureunöe yang geutuleh lé Teuku Mansor Leupeung lam hikayat “Sanggamara”.

Wajéb tuntut peungajaran
Dumna énsan agam dara
Hukôm adat dum atôran
Keu padoman bèk meuriba

Hukôm syara’ keunai Tuhan
Bab seumbahyang ngôn puasa
Hatta laén sileungkapan
Maséng jalan kameuhingga

Furu’ limông cuba pandang
Leubèh panyang bak ulama
Guna teungku peungajaran
Sang lam malam tubiët cahya

Miséu sulôh ngôn lhôh jalan
Supaya trang han meutuka
Leumah duröe miyup manyang
Leumah peusan ulèu bisa

Meuri pagèu mupat kubang
Paya ngôn blang jéut tabiza
Meuri putèh dungôn hitam
Nyang geularang meukri tanda

Óh ka meuri sileungkapan
Jeut tatimang rugöe laba
Hanlé syok gadoh waham
Trang pikéran nur ‘arifa

Peungajaran sang keumodöe
Ho hajat dröe tapeugisa
Seulamat jak tröh ngôn tawöe
Keudéh keunöe han meuriba

Hanlé teukông lam duröe
Han meupalöe rôh lam Bangka
Miséu laén lé that bagöe
Pike keudröe hé syedara.

Nyan ban geupeugah lè Teuku Mansor Leupeung, salah sidroë Uleebalang di Aceh Rayeuk bak jaméuh Holanda mat kuasa. Lhéuh neubaca beujeut keu peungajaran, beuna meunafaat bagi jamaah Peh Tem ban sigom donya. Tanyoë katrôk otnoë bek tariwang lè, jak tameurunoë keulayi tulèh baca lam bahsa droë teuh.

Poto keu peulengkap mantong bek hana sagai poto