නෑකම් ප්‍රශ්න | 5% For SL-Charity

මට ඉස්සර ඉඳලම නෑකම් අඳුන ගන්න ගියාම පැටලෙනවා. ඒ නිසා මම මට ඕන නෑකම කියලා තමයි නෑදෑයන්ට කතා කරේ. තාමත් එහෙමයි. අම්මා හරි ආච්චි හරි තමා මට හරියට නෑකම් කියලා දෙන්නෙ. අනිත් එක තමයි, නෑකම වයසට ගැලපෙන්නෙ නෑ වගේ නම්, එතකොටත් මම කතා කරන්නෙ මට ඕන නෑකම කියලා. නෑකමින් සීයා වෙන අයට, සීයා කෙනෙක් වගේ වයස නැත්නම් මාමා කියනවා. නැන්දලා මාමලා වෙන්න ඕන අයට වයස අඩු නිසා අයියා අක්කා කියලා කතා කරනවා. 😌

මෙච්චර කල් නෑකම් හරියට අඳුනගත්තෙ නෑ කියලා ප්‍රශ්නයක් වුණේ නෑ. ඒත් ප්‍රශ්න පත්තරේකට නෑකම් අඳුන ගන්න ආවොත් අන්න එතකොට මම අමාරුවේ වැටෙනවා! 😬 බැංකු විභාග වලදී විෂයන් කීපයක් තියෙනවා. ඒකෙන් එකක් තමයි IQ. මේ විෂයන් බැංකුව අනුව වෙනස් වෙනවා. හැබැයි කොයි විභාගයටත් IQ සහ සාමාන්‍ය දැනීම අනිවාර්යයි. මම දන්න විදියට බැංකු හා රාජ්‍ය සේවා විභාග හැම එකකටම වගේ IQ හා සාමාන්‍ය දැනීම විෂයන් ඇතුළත් වෙනවා. ඉතින්, මේ IQ පේපර් එකේ තමයි ඔය නෑකම් ප්‍රශ්න තියෙන්නෙ. ඒකෙ තියන ගණන් හදන එක ලේසියි නෑකම් හොයනවට වඩා. 😩 හැබැයි මට විතරක් ද දන්නෙත් නෑ ඒක අමාරු. 🙄

මම හිතාගෙන හිටියේ මට නෑකම් අඳුනගන්න එක දැන් නම් ලොකුවට අවුලක් නෑ වගේ කියලා. ඒත් ඒක වැරදියි කියලා ඔප්පු වුණා ගිය සතියේ IQ සර් ලියාගන්න දුන්න නෑකම් ප්‍රශ්නේ දැක්කම. 😒 ඒක එක අවුරුද්දක නීති ප්‍රවේශ විභාගයක අහපු ප්‍රශ්නයක්ලු. ඇත්තම කිව්වොත් මට ඒක හොඳටම පැටලුනා. 😬 ආච්චිගෙත් IQ බලන්න ඕන කියලා හිතාගෙන ආච්චිගෙනුත් ඇහුවා. හැමදාම නෑකම් කියලා දෙන එයාටත් පැටලුනා. 😌 සර් ඒක කියලා දුන්නට පස්සේ නම් හිතුනා එතන එච්චර ලොකුවට හිතන්න දෙයක් නෑනෙ කියලා.ඒත් විනාඩියක්ටත් වඩා අඩු කාලයක් ඇතුලත කල්පනා කරලා ඒ පැටලුම ලිහාගෙන උත්තරෙ හොයාගන්න එක තමයි කරන්න අමාරු. කොහොම වුණත් මම IQ පන්තියට සහභාගි වෙන්නෙ ගොඩක් ආසාවෙන්. මොකද ඒ ප්‍රශ්න වලට උත්තර හොයන එක වෙනම විනෝදයක්. 😋

මම ඒ ලියා ගත්ත ප්‍රශ්නෙ පහළින් දාන්නම්. ඔයාලත් try කරලා බලන්නකෝ. සමහරවිට ඔයාලට නම් උත්තරය ලේසියෙන්ම හොයාගන්න පුළුවන් වෙයි. 🤭

-පාරේ කාන්තාවක් හා පිරිමියෙක් ගමන් කරයි.
-පාරේ සිටි වෙනත් පුද්ගලයෙක් ගමන් කරන දෙදෙනාගේ පිරිමියාගෙන් විමසා සිටියේ "ඔබ සමඟ ගමන් කරන ඇය කවුද?" යනුවෙනි.
-ගමන් කරන දෙදෙනාගේ පිරිමියා පිළිතුරු දුන්නෙ "ඇගේ නැන්දම්මාගේ අම්මා මගේ නැන්දම්මායි." යනුවෙනි.

මේ දෙදෙනා කවුද?