එයා දැන් ලොකු ළමයෙක් - මට වාවගන්න බැරිව යයි.

මම හිතනවා හැමෝටම මතක ඇති මගේ සුරතලා බීනු ගැන. එයා මට තෑගි කරන කොට එයාගේ වයස මාස එක හමාරක් විතර ඇති. දැන් නම් එයාට වයස මාස අටක් වෙනවා.

සුරතලේට බල්ලෙක් ඇති කරනවා කියන්නේ ඉතින් ගෙදර ළමයෙක් හදනවා වගේ තමා, හරිම ආදරණීයයි. එයා මා ලගට ඇවිත් දැන් මාස හය හමාරක් විතර ඇති. උදෙන්ම නැගිටින බීනු මට නම් එළි වෙනකන් නිදා ගන්න කවදාවත් ඉඩ දෙන්නේ නැහැ. ආදරේට වලිගය වනමින් කෙදිරිලි හඩක් පිට කරමින් මගේ ඇදටම පනිනවා. තාම එයා ඇදට නගින්නේ නැහැ. ඒත් ඉදිරිපස කකුල් දෙක උස්සල ඇදේ එල්ලිලා පහුරු ගානවා මම නැගිටිනකම්ම. මමත් බොරුවට එයාව රවට්ටන්න නිදි වගේ ඉන්නවා ටිකක් වෙලා, එතකොට තමා වැඩේ, ශබ්දේ වැඩි කරලා ලොකු සෙල්ලමක් දානව.

සමාන්‍යයෙන් උදේට අපි නැගිට්ට ගමන් නාන කාමරයට යනවනේ, ඒත් කොහෙද මෙයා එක්ක. ඒ හැමදේටම කලින් මෙයාව විනාඩි ගානක් සුරතල් කරන්න ඕනි. නැත්නම් මට අඩියක් වත් ඉස්සරහට තියන්න එයා ඉඩ දෙන්නේ නැහැ.

මම කොහේ හරි ගිය දාට එයාට සාන්කාවලු, කෑම කන්නේ නැහැලු, එදාට එයා ස්ට්‍රයික් කරනවලු. මට උනත් කොහේ හරි එයාව දාල ගියාම නිතර මගේ ඇස් ඉදිරි පිට එයාගේ රූපය මැවිලා පේනවා.

උදේ අපි walk එක යන්න ලෑස්ති වෙද්දී මුලින්ම එළියට බහින්නේ එයා. හරියටම එයා දන්නවා අපි සපත්තු දාල සූදානම් වෙද්දී කොහෙද යන්නේ කියල. එයා එක්ක එළියේ යද්දී එයාට තියෙන්නේ මාර ඉල්ලුමක්, හැමෝම නතර වෙලා එයාව පොඩ්ඩක් හරි සුරතල් කරලා තමා යන්නේ. දැන් අපිට වඩා ගමේ යාළුවෝ ඉන්නේ එයාට.

නාවනකොට ආශා උනාට නාන්න සූදානම් කරද්දී මෙයා දන්නවා නාවන්න යන්නේ කියල. කතා කලාට එන්නේ නැහැ හොර ගෙඩිය වගේ කාමරේට වෙලා ඉන්නවා. පස්සේ ගිහින් උස්සගෙන ආවම හරි අපූරුවට නානවා.

දැන් එයාගේ බූල් හොදටම ඇවිල්ල නිසා මේ දවස් වල රස්නයත් එක්ක එයා ඉන්නේ හරි අසහනයෙන්, අපි ඉතින් එයා වෙනුවෙන්ම පුංචි ෆෑන් එකක් සවි කළා, මොකද අපිට මෙහෙම අමාරු නම් එයාට කොහොම ඇද්ද.

මගේ මහත්තය කියන්නේ එයා මගේ බොඩි ගාඩ් කියල, මොකද මම කොහාටද යන්නේ එයත් මා පස්සේ මම යන යන තැනට යනවා. මම නාගන්න නාන කාමරයට ගියාම මම එනකන්ම දොර මුර කරනවා.

ඉතින් දැන් මගේ බීනු මගෙන් ඈත් කරන්න බැරි තරමට මට ලං වෙලා ඉන්නේ. මගේ පැතුම කවදා හරි බීනුට කලින් මාව මිහිදන් කරන්න ලැබේවා කියලයි. එහෙම නැත්නම් මට වාවගන්න බැරිව යයි.

ස්තුතියි.