වැලි කතරේ සංග්‍රාමය.

මේ දවස් වල මම බලන පොත මේ තියෙන්නේ. මගේ එක විනෝදාංශයක් තමයි කියවන එක. මම පොඩි කාලේ ඉදල කියවන්න හරිම ආශයි. වැඩිපුරම කියවන්න කැමති පරිවර්තන කථා. මගේ පුතලටත් පොඩි කාලේ ඉදල පොත් කියවන්න හුරු කළා. නොවැරදීම හැම මාසයකම පොතක් ගෙනත් දෙනවා. මුලදී පුංචි ලස්සන ළමා කතා වලින් ආරම්භ කරලා පස්සේ මම වගේ පරිවර්ථන කියවන තැනට පත් කළා. දැන් කියවන පොතත් ඒ වගේ පුතාල පුංචි කාලේ ගෙනත් දුන් පොතක්.

මගේ පුරුද්දක් තියනවා පොතක් මිලදී ගත්තම ඒ පොත් මිලදී ගත් දිනය දාල මගේ අත්සන දාන්න. එහෙමත් නැතිනම් ඒ පොත් පුතෙකුට තෑගි දෙන පොතක් නම් ඒකත් ඒ පොතේ ලියන්න.

මම මේ පොත මිලදී අරන් තියෙන්නේ 2009 අවුරුද්දේ. වරහන් ඇතුලේ දාල තියනවා 11 කියල. ඒකටත් මොකක් හෝ හේතුවක් ඇති. ඒත් මට නම් දැන් මතක නැහැ හේතුව මොකක්ද කියල.

එදා බලපු පොත් නැවත නැවත කියවන කොට එදා මතක මහා ගොන්නක් හිත පුරා දුව යනවා. ඒවා එදා බැලුවද කියලවත් සමහර වෙලාවට මතකෙට එන්නේ නැහැ.

දැන් විවේකීව ඉන්න වෙලාවට මොන පොතක් උනත් කියවල ආශ්වාදයක් විදින්න පුළුවනි. සමහර වෙලාවට ළමා පොත් පවා කියවනවා.

කැප්ටන් W U ජෝන්ස් විසින් රචිත Biggles Defends the Desert නමැති නව කතාවේ පී බී සේනානායක මහතාගේ සිංහල පරිවර්ථනය තමා වැලි කතරේ සංග්‍රාමය කියල කියන්නේ.

කතාවෙන් කියවෙන්නේ ජර්මානු යුද භටයින් විසින් බ්‍රිතාන්‍ය ගුවන් යානා මංකොල්ල කෑමක් නතර කරන්න බ්‍රිතාන්‍ය යුධ භටයින් විසින් දියත් කරන ලද යුධ සැලැස්මක් ගැන සහ එය ජය ගත ආකාරය.

ත්‍රාසය, සහ භීතිය පිරුණු නවකතාවේ කතා රචකයා විසින් බ්‍රිතාන්‍ය යුධ භටයන්ගේ දක්ෂතාවය මනාව පෙන්වීමට උත්සාහ දරා ඇති බව මොනවට ඔප්පු වේ. අවසානයේ බ්‍රිතාන්‍ය යුද හමුදාවට ජය ලබා දෙමින් කතාව අවසන් කිරීම තුලින් පෙන්වා දී ඇත්තේ රචකයා බ්‍රිතාන්‍ය ගැතියකු වන බවයි.

කතාව කාට ගැති වුවද එය කියවීමෙන් අපිට යම් තෘප්තියක් ලැබෙන්නේ නම් එයයි රචකයා විසින් ලබා ඇති ජයග්‍රහණය.

පුංචි සිත් සනසන්න එදා ගත් පොත් අද මගේ සිත සනසනවා. ඒකයි වෙනස.

ස්තුතියි ලිපිය කියෙව්වාට.