තවත් එක කතාවක් | 5% to Sl Charity

ඉතින් කොහොමද අපේ කට්ටියට.. හැමෝම ආරක්ෂිතව ඇති කියලා හිතනවා. ඉතින් අද මොනවද ලියන්නේ කියලා කල්පනා කරද්දී මගේ හිතට ආව අදහසක් තමයි මං ඔයාලට කියන්න හදන්නේ. මං මුලින්ම යන්නම් අපේ පුංචි කාලයට. ඒ කියන්නේ අපිට යන්තම් වගේ මතකේ තියෙන දුරම අතීතයට. පොඩි කාලේ අපේ තියෙන්නේ පොඩි පොඩි අවශ්‍යතා ටිකක් විතරයි. ඒ කියන්නේ බඩගිනි උනාම කන්න ඕනි, ආස හිතුනු සෙල්ලම් බඩුවක් ගන්න ඕනි, ටීවී එකේ යන කාටූන් එකක් බලන්න ඕනි වගේ බොහොම සරල දේවල් ටිකක් තමයි පොඩි කාලෙ අපිට තිබුන අවශ්‍යතා උනේ.

ඉතින් ඒ කාලේ කිසිම දෙයක බරක්පතලක් නෑ. වගකීම් කියලා දෙයක් නෑ. හරිම සරල විදියට තමයි අවශ්‍යතා හැදිලා තිබුනේ. ඊට වඩා ටිකක් ලොකු උනාම ටිකෙන් ටික අවශ්‍යතා කියන ඒවා වැඩිවෙන්න ගත්තා. ඒ කියන්නේ කම්පියුටර් එකක් ගන්න ඕනි, අනිත් අයට වඩා ලස්සනට අඳින්න ඕනි, යාළුවා ළඟ තියෙනවට වඩා හොඳ ෆෝන් එකක් ගන්න ඕනි වගේ දේවල්. ඒ කියන්නේ අවශ්‍යතා විතරක්ම නෙවෙයි දැන් පොඩි තරඟයක් වගේ දේකුත් නොදැනීම වගේ ඇතිවෙලා. ඉතින් තවත් ටිකක් ඉස්සරහට ගිහින් රස්සාවක් වගේ කරන කාලයක් එනකොට වෙනම අවශ්‍යතා ටිකක් මතුවෙලා. ඒ කියන්නේ වාහනයක් ගන්න ඕනි, ගෙයක් හදන්න ඕනි, විවාහයක් කරගන්න ඕනි වගේ දේවල්. මේවා විතරක් නිකන්ම නෙවෙයි අනිත් අයත් එක්ක පටන්ගත්ත තරඟයත් මේවා අස්සෙම ගැබ්වෙලා තියෙනවා.

ඉතින් මෙහෙම දේවල් එක්ක ජිවිතේ ඉස්සරහට ගලාගෙන යනවා. මෙතනින් එහාට මේ දේවල්වල නැවතීමක් නෑ. ඉතින් මෙහෙම දේවල් හිතෙද්දි හිතෙනවා අපරාදේ පොඩි කාලේ ඉක්මනට ලොකු වෙන්න ඕනි කියලා හිතුවේ කියලා.