ඊයේ උදේ - 5% to Sl Charity

වැඩත් එක්ක මේ දවස්වලනම් ගොඩක්ම කාර්යබහුල කාලයක් තමයි ගෙවන්නේ. ඔන්න ඉතින් ඒ හින්දම ගොඩක් දවස් යනකන්ම ලිපියක් ලියාගන්න තරම් වෙලාවක්වත් හිතේ නිදහසක්වත් තිබුනේ නෑ. අද ඉතින් යන්තම් පොඩි වෙලාවක් හොයාගන්න පුලුවන් උනා. අවුරුද්දේ මුල්ම දවස් කියන්නේ ඉතින් හැමෝටම මේ වගේ තමයි නේද.

Source

මං මේ කියන්න යන සිද්ධියට ඊයේ දවසේ කොළඹ රස්සාව කරන ගොඩක් අය මුහුණදෙන්න ඇති කියලා මං හිතනවා. කොරෝනා වසංගතය පටන්ගන්න කලින් මං සතියේ දවස්වල වැඩට එන්න ගෙදරින් පිටත්වුනේ උදේ 6.10 ට විතර වගේ. ඒත් කොරෝනා අපේ රටේ පැතිරෙන්න පටන්ගත්තට පස්සේ රජයේ ආයතන, පාසැල් සහ ගොඩක් පෞද්ගලික ආයතන කලින් වගේ ක්‍රියාත්මක උනේ නැහැ. රාජකාරි සඳහාත් සීමිත පිරිසක් තමයි ගෙන්නුවේ. ඉතින් මේ හේතු හින්දා උදේට කොළඹට එන පිරිස අඩු උනා. ඒ කියන්නේ වෙනදට උදේට තිබුණු තදබදය අඩුවෙලා ගියා. ඒ හින්දා වෙනදා වෙලාවට වැඩට ආවොත් ගොඩක් කලින් ඔෆිස් එකට එවෙනවා. දවස් දෙක තුනක් යද්දී ඉබේටම ගෙදරින් එන වෙලාව 6.40 වගේ වෙන තරමටම පස්සට ගියා. දැන් ඉතින් ඒ පැය බාගේ වැඩිපුර නිදාගෙන ඇහැරින්න තමයි කාලසටහන වෙනස් උනේ 🤪🤪.

Source

ඔන්න ඉතින් ඒ පුරුද්දට ඊයෙත් ගෙදරින් 6.40 ට පිටත් උනා. ටික දුරක් එද්දී තේරුණා වෙනදට වඩානම් වාහන ටිකක් වැඩියි නේද කියලා. ඒත් ඉතින් අතුරු පාරවල්වල දාගත්තම ඒ වෙනස වැඩිය තේරුනේ නෑ. කොට්ටාව හරියට වගේ එද්දී තමයි තේරුනේ වැඩේ හොදටම බරපතලයි බයික් එකට අස්සෙන් රිංගලා එන්න තරම්වත් ඉඩක් නැතිවෙන තරමට වාහන වැඩියි කියලා. කොහොමහරි එහෙන් මෙහෙන් දාලා කොට්ටාව ටවුන් එකෙන් පැනගත්තා. ඒත් ඉතින් ප්‍රශ්නේ ඉවර නෑ. මට තේරුම්ගන්න බැරුව හිටියේ මේ මොනවා වෙලාද කියලා. එතනින් තලවතුගොඩට එද්දී තවත් ප්‍රශ්නේ දරුණු වෙලා. යන්තම් එහෙන් මෙහෙන් දාලා පේව්මන්ට් උඩින් එහෙමත් ගිහින් ඒ කලර් ලයිට් එකෙන් පැනගත්තා. එතනින් පාර්ලිමේන්තුව පැත්තට දම්මමත් තදබදය ඒ විදියමයි. ඒ හරියෙදි කොළඹට එන්න දීලා තියෙන අමතර මංතීරුවටත් පොඩ්ඩක් දකුණට වෙන්න දාගෙන තමයි දියට උයන ලඟට එනකන් ආවේ. වැඩේනම් නීතිවිරෝධී තමයි 🙄🙄. ඒත් වෙලාවේ හැටියට තදබදය අඩු කරන්න ඕනි හින්දම පොලිසියෙනුත් ඒ වැඩේට සහය දුන්නා 😎😎.

අද දවසේ රාජගිරිය ගුවන්පාලම අවට තදබදය

කොහොමහරි දෙයියනේ කියලා දන්න සියලු ශිල්ප දාලා 7.28 වෙද්දී ඔෆිස් එකට එන්න පුලුවන් උනා. කාර්වල එන අයනම් 8.00 පහුවෙනකන්ම ආවා. ඒ වෙනකනුත් මං දැනගෙන හිටියේ නෑ මේ තදබදේට හේතුව. පස්සේ තමයි හොයාගත්තේ කාරණේ. කොරෝනා වලට කලින් තිබුනාවගේ පාසැල් ඔක්කොම ඊයේ පටන්ගෙන. ඒ විතරක් නෙවෙයි රජයේ ආයතනත් පරණ විදියටම වැඩ. හැමදාම මේ විදියට එන්නත් බැරි හින්දා මං ඊයේ හිතාගත්තා අද ඉදන් කලින් වගේම 6.10 ට ගෙදරින් එන්න. ඒත් කියන්න දුකයි මට එලාම් එක වෙනස් කරන්න අමතක වෙලා ඊයේ දර්ශනේම අදත් රඟපාන්න උනා😁😁.