නංගිට වයලීන් එකක් | 5% for SL Charity

මම කලිනුත් කියල තියෙනවා ඇති, අපේ පුංචිල ඉන්නෙත් අපේ ගෙදර ලඟම කියල. මගේ වැඩ වලදි හවුල් වෙන මගේ සහායක ඩැනී තමයි පුංචිගෙ පොඩි දුව. ලොකු එක්කෙනා ටිකක් විතර කම්මැලියෙක් 😂. අක්කල ඔක්කොම එකයි කියල තමයි අපි කියන්නෙ.

ඒ දෙන්න පොඩි කාලෙ ඉඳලම අපේ ගෙදරට දූලා හතර දෙනෙක් ඉන්නව වගේ තමයි. වෙලාවකට අපේ වරප්‍රසාද දන්නෙම නැතුව තාත්තා එයාලට දීලා. ඒ දෙන්නත් ඕන දේකට අපේ තාත්තව හොයාගෙන එන්නෙ, කියන ඕන දෙයක් අරන් දෙනවා, ඕන දෙයක් කරලා දෙනවා නිසා.

එයාලගෙ තාත්තාත්, ඒ කියන්නෙ අපේ බාප්පා උනත්, අක්කයි මමයි ලොකු දෙන්නෙක් කියලා නැ. කොහේ හරි ගිහින් එනකොට හතර දෙනාටම තමයි අනම් මනම් ගේන්නෙ 🙊. මම මුලින්ම පාවිච්චි කරපු ලැප්ටොප් එක අරන් දුන්නෙත් බාප්පා තමයි.

ලොකු නංගි දැන් අට වසරෙ, එයාලගෙ හය වසර, හත වසර දෙකම කොරෝනා නිසා ගෙදරම තමයි ගත වෙලා ගියේ. හය වසරෙ ඉඳලා හැම ලමයෙක්ම සෞන්දර්ය විශයක් ඉගෙන ගන්නවා නෙ. නංගි තෝරගෙන තිබුනෙ සංගීතය. ඔන්ලයින් ඉගෙන ගත්තට, ඇත්තටම ඒක ඉතිං ප්‍රායෝගික නැනෙ.

දැන් ඔන්න ඉස්කෝල පටන් ගත්තට පස්සෙ, ඉගෙන ගන්නකොට, නංගිට වාද්‍ය භාණ්ඩයක් ඉගෙන ගන්න හිතිල. වයලීන් එකක් ඕන කියල තමයි කියල තියෙන්නෙ. අපේ අක්කා තමයි මට කිව්වෙත්. එතකම් මම දන්නෙත් නැ. අපි දෙන්නා එක්ක තීරණය කලා නංගිට වයලීන් එක අපි අරන් දෙමු කියල. අරන් දෙමු කිව්වට අපිට යන්න වෙලාවක් නැති නිසා, අරගෙන එන වැඩේ අපි බාප්පාටම බාර දුන්නා.

ඉරිදා උදේම වයලීන් එකත් අරන් බාප්පා ගෙදර ආවා. කෙල්ලො දෙන්නා එදානම් දහම් පාසල් ගියේ හිතකින් නෙමෙයි. මමත් වයලින් එක බලන්න එහෙ ගිහින් ආවා. අලුත්ම අලුත් වයලීන් එක අතට ගත්තම පුදුම ආසාවක් දැනුනෙ. මටත් වයලීන් ගහන්න පුලුවන් උනානම් කියලත් හිතුනා.

අද ආයෙමත් එහෙ ගිය වෙලාවෙ නංගි වයලීන් එකත් අරගෙන ආව මගෙ ලගට. යන්තම් නම්බුව බේර ගත්තෙ. තව පොඩ්ඩෙන් වයලින් ගහන්න වෙනවා 😅. මම ශේප් එකේ වයලින් එකේ කොටස් ටික අහලා එයාව අමරුවෙ දාල මාරු උනා. දැන් ඉතිං වයලීන් එක ඉගෙන ගන්නක්ම් ආසාවෙන් ඉන්නෙ. අපිත් බලාගෙන ඉන්නෙ, එයා වයලීන් වාදනය කරනව අහන්න 💖.