අද දවස | 5% for SL Charity

අද දවසත් වෙනදා වගේම තමයි ආරම්භ වුනේ. දැන් ඉතිං හැමදාම ගෙදර ඉන්න එකේ, දවසේ වෙනසක් වෙන්නෙ හරිම කලාතුරකින් නෙ.එකම චක්‍රයක කැරකි කැරකි ඒකාකාර ජීවිතයක් ගත වෙන්නෙ.

හැබැයි ඉතිං ගෙදරම ඉන්න පුලුවන් එකේ මම කැමති පැත්තකුත් තියෙනවා. කොරෝනා නැති සාමාන්‍ය කාලෙ උනානම්, වැඩට යන්න බෝඩිමක නවතින්න වෙනවා. එතකොට කෑම කන්න වෙන්නෙ කඩෙන්. ගෙදර ඉන්නකොට අම්මාගෙ කෑම එහෙම කාලා හොඳට ඉන්න පුලුවන්. අනිත් දේ තමයි, වැඩට යන්න බස් වල ට්‍රේන් වල දුක් විඳගෙන යන්න ඕනත් නැ මේ දවස් වල. අනිත් විශේෂම දේ, ඉරට කලින් නැගිටින්න ඕනත් නැනෙ 🙊.

අද මම මිදුල පැත්තේ ඉන්නකොට සමනලයෙක් ආවා. එයා අලු දුඹුරු අතරමැද පාටක් වගේ කෙනෙක්. මෙයා වගේ ගොඩක් අය මම දැකලා තියෙනවා අපේ මිදුලේ. මුලින්ම මේ වගේ එක්කෙනෙක් දැක්ක දවස් වල මම හිතුවේ එකම කෙනා ආයේ ආයේ එනවා කියලා. ටික දවසක් නිරීක්‍ෂණය කරනකොට මට තෙරුනා මේ එකම කෙනා නෙමෙයි බව. ඒත් එයාලා හරියටම සමානයි. හරියට ෆොටො කොපි ගහලා වගේ.

එකම වගේ අය නිතර දකිනකොට මම තේරුම් ගත්තා, මෙයාලාගෙ විශේෂයේ අය මේ කිට්ටුවක ඉන්නවා ඇති කියලා. අද මම දෙන්නෙක් දැක්කා. එක්කෙනෙක්ගෙ තටුවක් ටිකක් තුවාල වෙලා.අනිත් කෙනා නම් හොඳ සනීපෙන් ඉන්නවා වගේ. තුවාලෙ නොතිබුනා නම් අදත් මම එකම කෙනා ආයෙ ඇවිත් කියලා රැවටෙනවා.

හවස් වෙලා මම අපේ මාමලාගෙ ගෙදර ගිහින් එන්න ගියා. මට කලින් නංගිලා දෙන්නත් ගිහින් තිබුනා. මාමා තමයි අපේ උනාට මොකද අපි හැමෝම යන්නෙ නැන්දේ කියගෙන. එ ගිහින් ඉතින් එයා එක්ක කියව කියව ඉන්නවා. එයාලා මාස දෙකකට විතර කලින් නිරෝධායනය උනා. ඒ කාලෙ මල්ලියි මාමායි දෙන්න එක්ක හට් එකක් හදලා තිබුනා. ඔන්න අද තමයි මම මුලින්ම ඒක බලන්න ගියෙත්.

ඒක තියෙන්නෙ ගලක් උඩ. වැල් වලින් එහෙම වට වෙලා. පාරෙ ඉඳලා බැලුවට හට් එක පෙන්නෙ නැ. කැලෙ පැත්තෙන් තමයි උඩට නගින්න පඩිපෙල. ඒක පඩි පෙලක් කියන්නත් බැරි, ඉණිමගක් කියන්නත් බැරි අතරමැද අවස්තාවක්. මල්ලි ඒක ඇතුලෙන් ලිපක් එහෙම හදලා, ලන්තෑරුමක් තියලා එහෙම තිබුනා. විභාගෙන් පස්සෙ ගෙදරින් පැන්නුවොත් නිදාගන්නද කොහෙද කොට්ටෙකුත් තිබුනා 🤣.

ආපහු එන ගමක් මගදි කොලපතක් වැටිලා තියෙනවා දැකලා නංගිලා දෙන්නා ඒක ඇහිඳ ගත්තා. ගෙදර ගෙනත් කොල ටික ගලවගන්නවත් ඉවසීමක් නැ. මගදිම එකෙ නැගලා. ඒක ඇදගෙන එද්දි මට පොඩිකාලෙ මතක් උනා.

මේ ලමයි දෙන්නා කොලපතෙන් සෙල්ලම් කරනවා කියලා දන්න එකම මදැයි ඉතිං.