ඔබට සුබ පැතුම් මල්ලී

source

සෙනසුරාදා දින උදාවෙන තුරු ඔහු ඇඟිලි ගැන ගැන ඉන්නට ඇත. ඔහු එසේ වද්දී සෙනසුරාදා දිනය උදා නොවේයැයි සිතා මම මගේ සිතුවිලි මඟ හැර සිටීමට උත්සහ කලෙමි. ඔබේ කාමරයේ බඩු එකින් එක අඩුවෙමින් ඔබේ විශාල සූට් කේසය පිරෙනු මම නොදැක්කා මෙන් සිටීමට උත්සහ කලෙමි. මන්ද යත්, ඔහුට සමුදී යන මොහොත තෙක් දුක් වන්නට මට අවශ්‍ය නොවිණි.

අවසානයේ ඔහුගේ සිහිනය ඉටු වූ දිනය උදා විය. දහසකුත් බාධා, අවලාද, බිඳ වැටීම් සමඟ ගැටී අවසානයේ සරසවිය වෙත ඔහු පිය නගන දිනය උදාවිය. ඔහුට සරසවි වරම් ලැබුන බව දැනගත් දින මා සරසවියට තේරී ඇතිබව දුටුව දිනට වඩා මම සතුටු වුනෙමි.

ඔහුව අලුත් බෝඩිමට රැගෙන යන්නට මමද එක්වීමි. වගකීම් රහිත සැහැල්ලු ජිවිතයක් ගත කළ මට එය අක්කෙකුගේ වගකීමේ කොටසක් බව හොඳින්ම දැනුනි. ඔහුට සමුදී ඉතා ඉක්මනින් මට නැවත එන්නට අවශ්‍ය විය. තව දුරටත් රැඳී සිටීමෙන් සිදුවන්නේ හිරකරන් සිටින කඳුළු වලට බැඳී බැම්ම බිඳී යාම පමණි.

ඔහු ගියේ ඉගෙනීමට බවත් නැවත ඕනෑම මොහොතක නිවසට පැමිණිය හැකි බවත් මම හිතට අවධාරණය කරන්නට උත්සහ කලෙමි. නමුදු ඔහුගේ සිව් වසර නිම වී යලි පැමිණෙන විට මා මේ නිවසේ නොසිටිය හැකි බව හා ඇතැම් විට මේ රටෙහිද නොසිටිය හැකි බව සිත මට ප්‍රති උත්තර බදිද්දී මගේ සිතුවිලි සමඟ මටම තරහක් ඇතිවෙයි. සහෝදර ප්‍රේමය දුරෙන් හෝ කාලයා මඟින් දුරස් කල නොහැකි බැඳීමකි. එහෙයින් සිතත් සමඟ තර්ක කොට අවසානයේ මම සිත දැඩි කර ගත්තෙමි.

නමුත් ඒ දැනෙන පාළුව නම් දරාගැනීම ලේසි නැත. විටින් විට ඔහුට කරන ආදරණිය හිරි හැර, ඔහුගෙන් නෑ බෑ නොකියා ලැබුන සහයෝගය අමතක කර දවස ගෙවීම අපහසුය.

ලියන්නට බොහෝ දේ ඇතත්, ඒවා සිහි කිරීම වේදනා සහිතය. මා දුක්වීම අවශ්‍ය නැත. ඔහු මේ බිත්ති හතර තුල සිර වී අපගේ සුරතලා වී සිටීම අනවශ්‍ය ය. එහෙයින් සතුටෙන් නව සරසවි දිවිය අරඹන්න ට මම ඔහුට සුබ පතමි.