කුරුලු ලෑල්ල | 5% to SL Charity

ලංකාවෙ ගොඩක් ගෙවතු වල ලේන්නුන්ට, කුරුල්ලන්ට වගේ සත්තුන්ට කෑම දෙන්න කුරුලු ලෑල්ලක් තියෙනවා. මම හිතනවා මේක කියවන හැම කෙනෙක්ටම වගේ එහෙම තැනක් ඇති. මගේ මතකයේ විදියට එක වසරෙ බුද්ධ ධර්මය පොතේ කුරුලු ලෑල්ලක් හදමු කියලා පාඩමක් තුබුණා. ඒ පාඩමෙන් පස්සෙ අපේ ගෙදර හැමදාම කුරුලු ලෑල්ලක් තිබුණා. තියෙන තැන කාලෙන් කාලෙට වෙනස් වුණත් මේ අවුරුදු ගානම අපේ ගෙදර කුරුලු ලෑල්ල ක් තිබුණා.

කුරුලු ලෑල්ලෙ ලස්සන කතන්දර ගොඩක් තියෙනවා. උදේම අම්මා කුරුලු ලෑල්ලට කෑම දැම්මට පස්සෙ ගොඩාක් අය එතෙනට එනවා කාලා යන්න. විශේෂයෙන්ම ඉරි ලේන්නු ඒකට පුරුදු වෙලා ඉන්නෙ. හැබැයි එයාලා තනියම කන් නෑ. බත් දැම්මට පස්සෙ එයාලා ඒ ළඟම තියෙන පොල් ගස් වල බාගයක් දුරට දුවලා කෑ ගහනවා. ඒ අනෙක් අයට එන්න කියන්න. කොච්චර ආදරණීය සත්තු ද එයාලා??

ලේන්නු විතරක් නෙමෙයි, එතනට තව තව අය එනවා. කොට්ටෝරුවෝ දෙමළිච්චො,සමහර වෙලාවට දඬු ලෙන්‍නුත්. වෙලාවකට එතන ලොකූ කලබලයක් තියෙනවා. ඒත් ඒ රණ්ඩු නෙමෙයි. ඒ පොඩි සත්තු ඒ විදියට රණ්ඩු කරන් නෑ.

source

සමහර වෙලාවට කෑම දාන්න පරක්කු වුණොත් ඉරි ලේන්නු කෑ ගහනවා. මම හිතන්නෙ එයාලා වෙලාව දන්නවා.අද උදේ කෑම දාන්න යනකොට ඊට එහා පැත්තෙන් තියෙන පොඩි මඩුවෙ එහා පැත්තෙන් එකපාරටම චූටි ඔලුවක් එබුණා. කෑම හරිද බලන්න වගේ. ඒක අයිති ඉරි ලේනෙක්ට. එයාගෙ පොඩි අහිංසක මූණ තමයි මාව මේක ලියන්න පෙළඹුවේ.

දුරට වෙලා එයාලා කෑම කන හැටි බලාගෙන ඉන්න එක පුදුමාකාර මානසික තෘප්තියක් ගෙනත් දෙන වැඩක්. බුදු දහමේ හරය අරගෙන හැදුණු , කුරුලු ලෑල්ල, පින්තාලිය වගේ සුන්දර සංකල්ප වලින් මිනිස්සුන්ට කොච්චර ලස්ස්න වෙන්න පුලුවන්ද??