අවුරුදු දෙකකට පස්සේ 🦔🇱🇰 | 5% For SL-Charity

ඔන්න ඉතින් කාලයක් තිස්සේ බලාගෙන හිටපු දවසක් ඊයේ උදාවුනා. ඒ තමයි Lanka Premier League 2021 තරගාවලිය. ගිය වසරේ ඉතාමත් සාර්ථකව පැවතුනු නිසාම මේ වසරේ තරගාවලිය ගැන හැමෝම වගේ ගොඩාක් බලාපොරොත්තු තියාගෙන හිටියා. විශේෂයෙන්ම ශ්‍රී ලංකා ක්‍රිකට් ආයතනය විසින් සෑම තරගයක්ම නැරඹීම සදහා ප්‍රේක්ෂක ධාරිතාවයෙන් 50% කට අවස්ථාව ලබාදීම නිසාවෙනි. පසුගිය සතියේ පැවතුණු බටහිර ඉන්දිය කොදෙව් ටෙස්ට් තරගය ප්‍රේක්ෂකයන්ට නැරඹීමට අවස්ථාව ලබාදීමත් සමග මෙලස ජාත්‍යන්තර මට්ටමේ ක්‍රිකට් තරගාවලියක් ශ්‍රී ලංකා ප්‍රේක්ෂකයන්ට නැරඹීමට අවස්ථාව හිමිවන්නේ වසර දෙකකට පමණ ආසන්න කාලයකට පසුවයි.

ඒ නිසාම මටත් ලොකු ආසාවක් තිබුලා LPL බලන්න යන්න ඕනේ කියලා. අන්තිමට මැච් එකක් බලන්න ගියේ මං ලසිත් මාළිංගගේ අවසාන ODI මැච් එක. ඒ දැනට අවුරුදු දෙකකට කලින් නේ. ඉතින් අවුරුදු දෙකකින්ම මැච් එකක් බලන්න යන්න වුනේ නැති නිසා LPL පළවෙනි මැච් එක බලන්න යන්න මං තීරණය කලා. සමාරම්භක උත්සවයත් එදාම තිබුන නිසා ඒකත් බලන්න ආසවෙන් තමයි මම හිටියේ. හැබැයි හිතුව තරම් ඒකනම් එච්චර වැඩක් උනේ නෑ.

මේ දවස් වල කොළඹ ඉන්න නිසා ආර්. ප්‍රේමදාසේ තියෙන මැච් කොහොමත් බලන්න යන්න පුලුවන් නේ. ශ්‍රී ලංකා ක්‍රිකට් එකෙන් ටිකට් බුක් කරන හැටි දාලා තිබුන නිසා මම bookmyshow වෙබ් සයිට් එකෙන් ටිකට් තුනක් බුක් කලා තව යාලුවෝ දෙන්නෙක්ටත් එක්ක. බුක් කරපු ටිකට් ලබාගන්න තිබුනේ ග්‍රවුන්ඩ් එකේ තියෙන ටිකට් කවුන්ටර් එකෙන්. මම එතනින් ටිකට් තුනත් අරගෙන කවුන්ටරේ එහා පැත්තටම වෙලා ටිකක් වෙලා හිටියා යාලුවෝ දෙන්න කෑමට මොනවා හරි අරගෙන එනකන්.

එතන ඉන්නකොට මම දැක්කා පොඩි ටිකට් මාෆියාවක්. ඒ කවුන්ටරෙන් ටිකට් දෙන්නේ ඔන්ලයින් බුක් කරපු අයට විතරයි. ඒ ගැන දන්නේ නැතුව එන මිනිස්සුන්ව අල්ලගෙන එතන හිටපු කට්ටියක් වැඩි මිලට ටිකට් විකුණනනවා. එතන හිටපු සෙට් එකෙන් එක්කෙන් ඒ මොහොතෙම ඔන්ලයින් ටිකට් බුක් කරලා එතන කවුන්ටරෙන් අරගෙන ඒ ගැන දන්නේ නැතුව එන අයට වැඩි මිලට විකුණනවා. මේ ලංකාවේ ඉතින් වංචාව නැති තැනක් කොහෙද තියෙන්නේ.

අපි තුන්දෙනා 5.45 විතර වෙනකොට ග්‍රවුන්ඩ් එක ඇතුලට ගියා. ග්‍රවුන්ඩ් එකට ඇතුළු වෙන්න කලින් ආරක්ෂක අංශ විසින් පුර්ණ එන්නත් කරණයට ලක්වෙලාද ඉන්නේ කියලා වැක්සින් කාඩ් එක බලලා තමයි ඇතුලට එන්න දුන්නේ. හවස 06 ට ආරම්භක උත්සවයත් තිබිලා ටික වෙලාවකින් ටිම් දෙකේ කොල්ලෝ ටික ප්‍රැක්ටිස් කරන හැටි අපි බල බල හිටියා. වනිදුට එහෙම මැච් එක බලන්න ආපු අය පට්ට චියර් එකක් දුන්නේ. ඒ වගේම තමයි කාලෙකින් මැච් එකක දැකපු කුසල් මෙන්ඩිස්ටත් කට්ටිය ලොකු චියර් එකක් දුන්නා.

කොහොම හරි ඉතින් ගියපාර ශූරයන් වුනු Jaffna කණ්ඩායම පරදලා Galle කණ්ඩායම ඊයේ දින්නා. භාණුකගේ ලස්සන ශොට්ස් මෙච්චර කල් ටිවී එකෙන් බැලුවට ඊයේ තමා ඇත්තටම දැක්කේ.

ලංකාවේ ඉතින් හැමතැනකම වගේ ඊයෙත් මැච් එක ඉවර වෙලා මිනිස්සු හිටපු හැමතැනකම මේ වගේ කාපු බීපුවා දාලා ගිහිල්ලා තිබුනා. පොදු ස්ථාන ලස්සන කරන්න මිනිස්සු ඉතින් හරි ආසයි නේ🥴

අදට ඉවරයි....🚶