ලෝකේ ලස්සනම ලෝක ළමා දිනේ අරන් කොළඹින් ගමට ❤️

හැමෝටම සුබ දවසක් කියලා පටන් ගන්නම්. ඔක්තොම්බර් මාසයේ මුල් සතිය බොහෝ දෙනෙක්ට විශේෂ වන්නේ ලෝක ළමා දිනය සහ ලෝක ගුරු දිනය යෙදිලා තියෙන නිසාවෙන්. ලෝක ගුරු දිනය ඔක්තොම්බර් 05 වෙනිදට යෙදිලා තිබුනත් ලංකාවේ ඒක සමරන්නේ ඔක්තොම්බර් 06 වෙනිදා. ඉතිං ඔක්තොම්බර් 06 වෙනිදා ලංකාවේ ගොඩාක් පාසල් වල ගුරු දිනය ලස්සනට සමරලා තිබ්බා. අපේ අක්කටත් ලස්සන ලස්සන තෑගි කිහිපයක්ම ළමයින්ගෙන් ලැබිලා තිබුනා. ඒවා දැක්කාම මට මතක් උනේ අපේ පාසල් කාලේ.

ඉතිං මං අද ලියන්නේ ගුරු දිනේ ගැන නම් නෙමෙයි මේක ඇවිල්ලා ළමාදිනේ ගැන පුංචි කතාවක්. මගේ යාලුවෙක්ගේ යාලුවෙක් ඉන්නවා PHI මහත්තයෙක් හසලක නගරයට ආසන්නව. එයා දවසක් යාලුවට කියලා තියෙනවා හසලක ඉදන් 19km ක් විතර ඈත පුංචි ඉස්කෝලයක් තියෙනවා මේ ඉස්කෝලෙටම ඉන්නේ ළමයි 39 දෙනයිලූ. හරිම අමාරුවෙන් තමයි ඒ ළමයි ඉස්කොලේ යන්නේ. සමහර ළමයින්ට හරියට සපත්තු දෙකක්වත් නෑලු. ඒ මදිවට ඒ ගමේ වල් අලි ප්‍රශ්නේ ලොකුවටම තියෙනවලු. ඉතිං PHI මහත්තයා අහලා තියෙනවා අපි පුළුවන් විදිහට මේ ළමයින්ට මොකක් හරි උදව්වක් කරමුද කියලා.

ඉතිං ඒ ළමයින්ට කොහොම හරි උදව් කරන්න ඕනේ කියලා හිතලා මගේ යාලුවා පොඩි පොඩි පෝස්ට් හදලා Facebook එකෙයි Whatsapp එකෙයි ශෙයා කරලා. ඒ අතරේ දන්න දන්න අයටත් කියලා. ඒ විදිහට යද්දි පොඩි දේවල් එයාට එකතු කරගන්න පුළුවන් වෙලා. ඒ විදිහට ටික කාලයක් ගියාට පස්සේ තමයි අපිටත් මේ ගැන එයා කිව්වේ.

ඉතිං ඒ විදිහට facebook එකේ ශෙයා කරපු දේවල් නිසා දවසින් දවස අපිට එකතු වෙන පොඩි පොඩි අධාර වැඩි උනා. සමහරු පොත් ගෙනල්ලා දුන්නා, තවත් සමහර අය පෑන්, පැන්සල්,පාට පෙට්ටි, පැන්සල් පෙට්ටි ඔය විදිහේ ළමයින්ට ඕනි කරන දේවල් පොඩි පොඩියට හරි දීලා තිබ්බා. එහෙම දෙන්න බැරි අය සල්ලි දුන්නා කැමති දේවල් ගන්න කියලා. ඒ විදිහට අපිට රට ඉන්න කෙනෙක්ගෙන් සල්ලි හම්බුනා ඒ ඉස්කෝලෙට කොම්පියුටර් එකක් අරන් දෙන්න කියලා. ඒක තමයි ඒ ඉස්කෝලෙට ගොඩක්ම වටින තැග්ග. මොකද ඒ ළමයින්ගෙන් ගොඩක් අය කවදාවත් කොම්පියුටර් එකක් දැකලා නෑ.

ඔය විදිහට අපි ඒ ඉස්කෝලෙට යන්න කලින් දවසෙත් පොත් වගයක් හම්බුනා. අපි ඒ ළමයින්ට ක්‍රීඩා උපකරණත් ගත්තා. අපිට තව ඕනි වෙලා තිබ්බ දෙයක් ඒ ළමයින්ට ආස හිතෙන තවත් මොනවා හරි දෙයක් අපිට එනකොට දීලා එන්න තිබ්බ අසාව. ඉතිං අපි හිතුවා ඒ ළමයින්ට චොක්ලට් වගේ දෙයක් දුන්න නම් ඒ ළමයි ඒකට ගොඩක් ආස වෙයි කියලා. හැබැයි අපිට චොක්ලට් ටික ගන්න සල්ලි තිබ්බේ නෑ.ඉතිං ඒ ටික මිලදි ගන්න අපිට @sl-charity එකෙන් මුදල් ලැබුනා. ඉතිං ඒ නිසා අපිට ඕනි කරපු විදිහටම චොක්ලට් ටික ගන්න පුළුවන් වුනා. අපි එදා ඒ ඉස්කෝලෙදි කරපු වැඩසටහනේදි ළමයින්ගේ ආසම අවස්ථාව උනේ ඒ චොක්ලට් මල්ල ළමයින්ගේ අතට ලැබුනු මොහොත. ඒ මූනු වල තිබ්බ සතුටට දෙන්න වටිනාකමක් නැති තරම්. මොකද කවදවත් ඒ ළමයි රට චොක්ලට් වල රස බලලා තිබිලා නෑ.

ඔක්තොම්බර් 01 වෙනිදා සෙනසුරාදා දවසක් නිසා අපි සැප්තැම්බර් 30 තමා මේ එකතු කරගත්තු දේවල් එක්ක ඒ පුංචි මල් කැකුළු ටික බලන්න ඒ ඉස්කෝලෙට ගියේ. අපි ඒ බඩු ටිකත් අරන් ඉස්කෝලෙට එන හැටි ඒ ළමයි ඈත ඉදන් ආසවෙන් බලන් හිටියා. අපි ඉස්කෝලෙට ගියාට පස්සේ ගමේ අය අපිට උදේ කෑම ලැස්ති කරලා තිබ්බා. ඒ කිරිබත්, හැලප, කෙසෙල් අවසානෙට හකුරු කැල්ලක් එක්ක ප්ලේන්ටියක් දුන්නා.

අපි ළමයි ඔක්කොම එලිමහනට එකතු කරගෙන වැඩසටහන ඊට පස්සේ පටන් ගත්තා. ඉස්සෙල්ලම පාසලේ විදුහල්පති තුමා ගමේ හැමෝටමයි, ළමයින්ටයි අපිව අදුන්වලා දුන්නා. ඊට පස්සේ අපි අපේ වැඩසටහන පටන් ගත්තා. ඉස්සෙල්ලම අපි ළමයින්ට බීම පැකට් එකකුයි, කේක් කැල්ලකුයි දුන්නා. ඊට පස්සේ ළමයි හැමෝම පන්ති පිළිවෙළට එකතු කරගෙන එයාලට චිත්‍ර අදින්න දුන්නා. අපි යද්දි ලැප්ටොප් අරගෙන ගියේ. ඒ ලැප්ටොප් පාවිච්චි කරන හැටි අපි ළමයින්ට කියාදිලා Paint වලින් චිත්‍ර අදින හැටිත් කියාදුන්නා. අපි හිතුවට වඩා ඉක්මනට ඒ ළමයි පොඩි උනත් ලැප්ටොප් වල වැඩ ඉගෙන ගත්තා.

ඊට පස්සේ අපි දවල් කෑම වේලත් ළමයින්ට දුන්නා. ඒ දුන්නේ කෙසෙල් කොල එක පේලියට දාලා, එකේ තමයි අපි ළමයින්ට කැම බෙදලා දුන්නේ කන්න..හැමෝම හරි ආසවෙන් ඒ කෑම කෑවා. දවල් කෑමෙන් පස්සේ අපි හැම ළමයෙක්ටම අයිස්ක්‍රීම් එක ගානෙත් දුන්නා. ඊට පස්සේ අපි ගෙනාපු තෑගි හැම දෙයක්ම අපි ළමයින්ට බෙදලා දිලා අවසානෙදි ඒ ළමයි එක්ක සිංදු කියලා විනෝද වෙලා සතුටින් ආවා. අපි අවසානෙට එනකොට පාසලේ විදුහල්පතිගේ ඉදන් දෙමව්පියෝ හැමෝම අපිට පිං දුන්නා. ඉතිං ඒ පින මේ වැඩේ සාර්ථක කරගන්න නන් අයුරින් දායක වුන හැමෝටම අයිතියි. ❤️ ඉතිං ඒ දවස තමයි මගේ ජිවිතේ අමතකම වෙන්නැති ලස්සනම ලෝක ළමා දිනය...❤