උපාධි ගැටලුව.. 5% to SL- Charity

පහුගිය දවස් ටිකේ හුඟක් අය තමන්ගෙ අවුරුදු හතරක මහන්සියට කැපකිරීම් වලට ලැබෙන ඉහළම වටිනාකම අරන් එයාලගෙ සතුට ගැන ලියල තිබුණා. ඒ දවස් ටිකේම උපාධි උත්සව ලොකු මාතෘකාවක් වෙලා තිබුණ. ඉතින් ඒ කතා මට මතක් කළේ උපාධිය ගත්ත දවස... මගේ අම්මයි තාත්තයි මං ගැන අහිංසකව ආඩම්බර උන දවස. ඉතින් එදා ගත්ත ෆොටෝ බල බල, උපාධිය අතට ගන්න වීඩියෝ බල බල මං ඔය අතීතයට ආපහු ඇවිදන් ගියා හිතින්.

ඉතින් එදා විශ්ව මගේ ෆොටෝ ගන්න ආවෙ මෙන්න මෙයාවත් අරගෙන.

මං එයාව පරිස්සමට හංගල තියන් හිටියෙ පිස්සු කන්න දැක්කොත් එයා ඒකට අයිතිවාසිකම් කියන බව දන්න නිසා. හැබැයි අද එයා ඒක දැක්ක.

"අනේ පුංචී...මට මෙයාව දෙනවද.." පිස්සු කන්න ඇහුව.

"බෑ... මේ බාප්ප දුන්න තෑග්ගක්නෙ." මං කිව්ව.

"ඉතින් ඔයා ලොකු එක්කෙනෙක්නෙ පුංචී.." ඒක කොහොමහරි ගන්නම තමයි පිස්සු කන්න බලන්නෙ.

"ඔයා තව චුට්ටක් ලොකු උනාම දෙන්නංකෝ.. නැත්තං ඔයා ඕකෙ කුණු ගායි.." මං කිව්ව.

"මේ මොකද්ද පුංචි එයා අතේ තියන් ඉන්නෙ?"

"ඒ තමයි උපාධිය"

"උපාධිය කියන්නෙ"

"කැම්පස් ගිහින් හොඳට ඉගෙනගත්තම දෙන සහතිකයක්නේ..." මං ඇඳුම් අල්මාරිය අස් කර කර කිව්ව.

" ඉතින් ඇයි ඒක රෝල් කරල තියෙන්නෙ?" අම්මෝ...පිස්සු කන්න තේරුමක් නැතුව උනත් අහන ඒවට මාව නිරුත්තර වෙනව.

උපාධි සහතිකේ රෝල් කරල දෙනව කියල කතාවට කිව්වට ඇත්තටම උපාධි උත්සවේදිම සහතිකේ දෙන්නෙ නෑ මං දන්න තරමින්. ඒකට ටික දවසක් යනවනෙ. එදාට දෙන්නෙ අර හිස් බම්බුව විතරනෙ. ඒත් මං හිනාව තද කරන් කියනව රෝල් කරල දුන්නම ගන්න ලේසි නිසා ඒක දෙන්නෙ එහෙම තමයි කියල. ලොකු උනාම එයා දැනගයිනෙ.

එයා කවදහරි උපාධියක් ගන්න දවසක් එනකොටවත් උපාධියට හරියන රැකියා තියෙන රැකියාවලට හරියන උපාධි හදාරන්න පුළුවන්..අධයාපනයට, උපාධියට නිසි වටිනාකමක් තියෙන රටක් බිහිවෙලා තිබුණොත් හොඳයි..