ومن الحب ما قتل... هذا الفيلم تجسيد واقعي و حقيقي لهذه المقولة

الفيلم ده بقي بيحكي عن رجل حب بنت جميله و كان بيحاول يعمل اى حاجه عشان يكون معاها, و هي عملت كل حاجة علشان تسعده و تبقي جنبه و سنداه لانها انبهرت بمدى حبه فى اول العلاقه و تمسكه بيها
و فعلا اتجوزوا .. بس.. هو بدأ يتغير بعد فتره .. و بدأت هي تشعر بالتوتر و الخوف .. و كان كل فتره بيبعد عنها اكتر و كانت بتتصدم فيه كل يوم اكتر .. بدأ يهينها, يقلل من قيمتها, يغضب لما تتطور فى حاجه و تنجح.يضربها, قتل الكلب بتاعها لمجرد انها بتحبه,منع عنها الفلوس , و اخيرا هددها بالقتل
و لما حاولت تطلب الطلاق و تبعد .. قتلها (لانه رافض انه يبعد عنها ومتملكها) وهي غلطت انها شافت منه كل دا وفضلت ..له بتديله فرص! الفيلم عن قصة حقيقية حدثت بالفعل!!

الكلام ده مش مبالغ فيه .. و الاشخاص دول موجودين .. و العلاقات دى وارده جدا

ارجوك لو فيه اى مؤشر مع شريك حياتك أو حتي حد من أهلك أو قرايبك بيوضحلك انه شخص غير طبيعى او أنانى او استغلالى إبعد

الشخصيات دى سهل اوى تبان

**الشخص اللى دايما بيرمى اللوم عليك و يحاول يحسسك بالذنب و يهرب من مسئوليته و الاعتراف بغلطه

** الشخص الاستغلالى اللى بيدمر نفسيتك و بيمتص طاقتك و دايما بتحس بحزن و الم نفسى معاه

** الشخص الانانى اللى بيخلى الدنيا كلها و الناس يدوروا حواليه و بيعتبر نفسه مركز الكون و بيلغى قيمتك

**الشخص المدمر اللى بيحاول يحبطك و يحسسك دايما بفشلك و بيرفض نجاحك و يحسسك ان اى حاجه بتعملها ملهاش قيمه ولا اهميه

**الشخص اللى بيرمى كل غلطه واهانته وخيبته عليك و يحسسك انه رد طبيعى لتصرفك البشع اللى وصله لكده

** مع الاسف فيه شخصيات كتير منهم مش سهل تكتشفها ولا سهل تبعد عنها .. لانهم بيكونوا فى منتهى الذكاء انهم يعرفو يخبوا عينك انها تشوفوا حقيقتهم.. او بيكونوا فى منتهى الغباء لدرجة انهم مابيكونوش مدركين لمرضهم و بيحاولوا يسقطوه و يرموه عليك .. و لو اكتشفت ده فى يوم مش هتلاقى غير انكار و محاوله لاسقاط كل كلمه عليك انت

خلو بالكم .. لو حسيت انك واقع فى الكارثه دى ابعد
( الشخصيات دى مش بتتغير) استحاله هايتغيروا .. لانهم ببساطه مش هيعرفو يحبوا بجد ..لانهم مرضى ..لانهم فى الحقيقه من جوه اوى مش عارفين يحبوا نفسهم ولا بيعرفوا يقبلوا حد .. لانهم فاضيين من كل حاجه من جواهم و مفيش حاجه يقدموها
مش هتلاقى جوه غير الالم و الرفض و الاذى

ابعد قبل ما تدمر كليا .. لو ماتقتلتش جسديا منه .. هايموتك نفسيا .. و هاتكون حد انت ماتعرفوش فى الاخر

لو مش عارف تضحك و تنطلق و حاسس باحتواء و امان و قبول
لو مش بتغلط و بتلاقى قصاد غلطك حضن مفتوح و قبول
لو مش حاسس ان اللى قدامك ده بيتك اللى بترتاح فيه
لو مش عارف تتعرى نفسيا و تطلع كل عيوبك قدامه و تلاقى قبول ابعد

ماتسمحش لحد يشوهك نفسيا

..و من الحب ما قتل