台灣食店開到成行成巿，不過好多試咗好多間之後，發現好多餐廳推出嘅食物都冇乜台灣風味，唔多唔少都開始有啲抗拒喺香港再試台灣食店。
不過女朋友話見到間舖裝修得幾簡約，望到餐牌覺得價錢又唔貴，所以決定俾一次機會湯‧米！

入到店內，覺得佢都幾似台灣啲小店，而飲品方面，都係近排好Hit嘅芝士奶蓋類同水果茶。環境乾淨、簡約，仲播住女朋友好鐘意嘅周董歌！

女朋友點咗呢個灸燒荷蘭五花豬肉飯，望落去好大碗，而且肉嘅份量好多。
豬肉一放入口，覺得肉類油脂分佈好均勻，肉質唔「鞋口」，醬料又夠味，面頭放咗開胃嘅酸菜，女朋友讚不絕口！

而我就揀咗芝麻醬滷水牛展冷麵，麵上面仲有青瓜、紅蘿蔔絲同濃郁嘅芝麻醬，撈埋一齊食口感好有層次，另外仲要大讚佢嘅牛展！ 通常牛展都會好韌，但呢度嘅牛展出乎意料咁林！而且好入味！！

而跟餐送嘅酸青瓜就好爽脆，本身唔太鐘意食太酸嘅食物，但呢碟青瓜唔會太酸，所以我居然食晒！

去到台灣一定會去夜巿食台灣腸，而呢度嘅台灣腸估唔到都有夜巿嗰種味！之前去過幾間台式食店食台灣腸，佢哋係完全做唔到台灣嗰種口味，但呢度居然食到咁高質嘅台灣腸，真係好驚喜！

花枝墨魚丸配甜酸醬，帶有非常輕微嘅辣味，很開胃。

柚子雞翼外皮香脆，一咬落去仲有肉汁流出嚟，真係不得了！

蕃茄湯都好足料！入面仲有蛋花同香蔥，湯味清甜，唔會話好咸。

最後就係呢兩杯飲品，女朋友嘅係左邊嘅超級水果綠妍，入面有大大塊西瓜，仲食到粒粒熱情果，味道酸酸甜甜咁，好清新。 而我揀嘅芝士紅玉，都好好飲！芝士味濃得嚟唔會太杰，我慣咗先啜咗上面嘅芝士先，然後先再飲下面嘅茶，單單啜芝士嘅時候完全唔會覺得好膩，飲到咁上下，芝士同茶混合咗之後都仲好好飲！
呢間湯‧米絕對可以為我哋去台灣旅行前暫時止住渴先，性價比真係好高！！

Please upvote, resteem and follow @steemitowner!

请投票支持，转发及追踪 @steemitowner！

Want to know more about me?
Please take a look 👉 My Introduction
想认识我更多？
请看一看 👉 自我介绍