我的足球投注策略

我的投注策略

先簡介我自己：
（１）除左女人，我就最鍾意鑽研賭技；
（２）我是數據分析派的投注人，我相信一切都有數據可尋，相信數據會重複出現；
（３）已冇買馬十年，收山的原因是贏了一舊錢；另外買馬實在是太複雜的遊　戲，對腦力及體力都係超沉重的負荷；
（４）買波２年多，盈餘仍不停增長，由最初的數百元至今百幾萬；

點解要分享我的投注策略俾各位聽？

因為我從以前買馬開始到而家買波，見到太多人損手，但佢地係唔知點解會損手．．．真係死左都唔知點解．．．當然每一個人都有自己的一套投注心得，我亦絕對尊重每一個人的投注心得，但如果小弟將我個人的小小成功經驗同大家分享，希望對一些朋友有點啟發／反省，從而有所斬獲，咁都算係回饋社會嘛。正所謂：街外錢，大家搵。總之各位認為我的愚見O岩聽就聽啦，唔O岩聽就當我放屁吧。

閒話休提，言歸正傳。愚見認為要作為成功的投注人，當然要有一些必要的因素，例如（Ａ）本錢；　（Ｂ）週詳的投注計劃；　（Ｃ）穩定的心理質素；　等等．．．但我以前從買馬及現在買波，都認為有兩個投注人的死穴，其實是必須衝破的，否則都可能幾難贏到多錢．．．

這兩個死穴就係：
１）輸左想贏番　──　驟眼看來，這是很自然的事．．．但往往就是會令到投注人越輸越多．．．對付的方法係：一開始已有全盤的投注策略編排，有時間性，有目標，同埋要有上佳穩定的心理，咁就唔會因為“輸緊錢”而影響投注，從而越輸越多。

２）冷的唔敢買　──　普遍的人都有一個錯覺，就係熱的會比冷的大機會；或者越熱越穩陣．．．結果會熱的會買多ｄ，或者訓身都得．．．但冷的就算會買，都只係小注．．．咁樣就真係比較難贏多錢的．．．因為在數學上（不要忘記我是數據分析派），冷熱的機會應是一樣的（以主客和為例，同是１／３）。俾一條好簡單的習題大家試試：我有＄２００買馬，要買一條Ｑ一拖二，一條Ｑ有八倍，一條有二十倍，你會點買呢？小弟的買波程序是分三個部份的：（Ａ）賽前分析；　（Ｂ）投注；　（Ｃ）賽後檢討；

先講我點樣做賽前分析：

相信每一位師兄在買波之前，一定會”度”波啦．．．唔係又點會去買呢？但大家又點”度”的呢？　你會從那方面去”度”一場波呢？　當你去落實去買一場波時，又有乜野理由支持你去買這場波呢？我見過好多波友都係名氣球隊派或鍾意心中球隊派，佢地只會不停追捧。我亦見過主勝／客勝派。總之是林林總總，乜人都有。當然我唔會評論大家點去”度”波啦，但我就會從以下十四方面去研究每一場波的。

（１）近十場賽續；
（２）主／客場成績；
（３）主／客場入球；
（４）主／客場入球模式；
（５）主／客場失球模式；
（６）雙方近五年對賽成績；
（７）下場對手；
（８）傷兵（包括出場陣容）；
（９）天氣；

以上的九個方面，都唔使多解釋的，應有好多師兄做得好過我添。但我想講多Ｄ以下的五個方面。

（１０）賠率　～～　不只是普看主客和及亞洲盤的賠率，仲要盡可能參考不同莊家的賠率。另外亦要顧及球隊在咁樣的賠率下的以往的表現。另外臨場的賠率變動亦係一個參考；

（１１）盤路　～～　不只是最近或今季的盤路，都要看以往對相同對手的盤路，及主／客場的盤路；我亦會歸納以往球隊在同一時期的盤路作為參考；

（１２）估計教練想法（目標）　～～　好簡單，就係假設你係那球隊的領隊，你會在今場波SET乜野目標呢？　當然冇教練想輸波．．．但都要看現實呢。有Ｄ教練會在某些場次時真係會求一分的，咁當然就會在出場陣容中反映到了。

（１３）最近球隊新聞　～～　球隊最近有冇正面／負面的新聞？　都會對該場球員的士氣等等，或多或少都有影響。最經典的一次係上年歐冠，車路主場對比錫達斯，車仔球員受懷疑強姦案困擾，結果比錫達斯爆大冷。

（１４）假波可能性　～～　這點就真的係”靠估”多Ｄ了．．．所以純係一個參考．．．但相應在賠率上都可以有一些端倪睇到Ｄ的．．．

可能大家必定會在”度”波時，用以上某幾個方面去”度”，亦會從某些方面”度”出一個結論，從而去買一場波。

但我想提出的是，某一兩個方面（FACTOR)對一隊有利．．．其實未必全部FACTORS都對那一隊都有利的。往往好多朋友就係因為只看到那一兩個有利的FACTORS而沒有看到那些不利的FACTORS，從而作出一個錯誤的投注決定。

我的”度”法就係：一場波之中，盡可能綜合咁多的Factors，邊隊有利的Factors多就買邊隊。

～～～～～～～～～～～～～～～～～～～～～～～～～～～～～～～～～～

但有以下的事情請注意：

～～　週六及日每日都有幾十場波，實在沒有可能全部”度”．．．故只宜集中火力”度”一些較為熟悉的聯賽（例如四大聯賽啦）；

～～　每次的賽後檢討中（例如檢討得／失球的模式），其實可以幫到下一次的賽前分析好多的；

～～　可能有朋友會問／罵我，要花咁多時間至贏到可能好少錢，值唔值呀？時間都金錢播．．．我的態度就係：唔辛苦又點得世間財丫．．．．．．錢來架．．．如果冇心思熟慮過就胡亂去投注，咁係咪一個明智的人呢？　我以前投注賽馬，都算贏得唔少啦，ｄ朋友會話我”好彩”．．．但我只會平靜的同佢地講：我唔係好彩架，我辛苦研究時，你地睇唔到姐．．．我贏番來的錢真係唔係不勞而獲架。

～～～～～～～～～～～～～～～～～～～～～～～～～～～～～～～～～～～

當經過縝密的賽前分析後，要去到真金白銀的投注了。咁究竟點樣至可以用最少的注碼能換取最高的回報呢？　下次再同大家傾下　”投注”　時要留意的４０個 Factors 吧。

先多謝各位師兄的分享。

今次我會分享我在投注時，要留意的４０個FACTORS。這４０個FACTORS說穿了其實是在投注時應該做的事和不應該做的事，或者可以話係在投注時應該有的態度和不應該有的態度。所以其實是有２０個FACTORS，分開正負（必須／避免）兩面的。

（１）必須：投注過關　　　避免：投注單頭

足球的賠率不及賽馬的，賽馬可以投注在一場的WQ等，可能已有不錯的回報；但波你買一個單頭，可以贏到幾多錢先？所以買波要贏錢，必須要買過關。咁至於過幾多關才適合呢？我有一位讀數學的朋友同我仔細分析過，其實過三關至四關係最適合的，無論在風險及回報上都算係比較平衡。

（２）必須：冷門過關　　　避免：熱門過關

意思並不是全買冷門的過關．．．熱的就唔買．．．而係熱門在賽前分析絕對利好後，同時在賠上又有值搏率就可以買。如果買埋ｄ：１．２ｘ１．３５ｘ１．４．．．正所謂中左都冇肉食．．．（但就好似都幾多人會係咁買的．．．因為佢地跌入左我最初講的的２個投注死穴之一：冷的唔敢買，熱就以為越熱越穩陣．．．）

（３）必須：兩瓣過關　　　避免：單頭過關

這點要分享多一ｄ了。以買一條３ｘ１為例子，每關都只買一瓣的話，中的機會率是多少呢？　其實只是１／２７。　因為每關投注人只有一瓣（３３．３３％）機會中，馬會／莊家有兩瓣（６６．６６％）機會贏你錢．．．對投注人好不利．．．唔中的機會其實好大的．．．咁點樣將投注人從不利變為有利呢？

如果我在這３關之中，有２關都是選兩瓣的，那麼中的機會就會提升到４／２７，比三關只選一瓣高了四倍的命中率。　但可能你會問：要買４條飛，咁泛本．．．另外本錢大了，回報亦低了．．．咁我會咁唸的：冇錯，的確買的４條飛之中只有一條係有機會中的，足足有三條會浪費，但亦唔好忘記，我係有４個機會會贏到錢的，比起只有”唯一”的一個機會可以贏到錢，係咪會有利得多先？　另外有關回報少了的問題，冇錯，因為本金多了，自然回報的百分比會細左，但我又會問一個問題，我地買波係咪想”中波”先？　”中波”是必須要的嘛。　假設有人買一條３ｘ１中正會有３０倍，但有人用以上的方法買四條３ｘ１，到最後中了有８倍，你地會點買呢？　我就一定會揀後者，因為要”中波”先最緊要．．．前者只要”開側”少少．．．就算有３００００倍都冇中．．．因為係”唔中”．．．

（４）必須：冷多熱少　　　避免：冷少熱多

假設用以上的原則去買四條３Ｘ１，賠率分別為：　２２倍　２０倍　１８倍　１６倍　我就必定會　２２倍　及　２０倍　那兩條買多Ｄ的，１８倍　及　１６倍那兩條買少Ｄ．．．咁點為之多．．．咁為之少呢？　我就普遍會用（４，３，２，１）的比重去買的。即是我在計劃之內會用＄１０００去買這四條三關的，咁我就會分別用＄４００，＄３００，＄２００，＄１００不同的注碼去買，絕對不會用平均（即＄２５０）去買的。

（５）必須：補本投注　　　避免：忘本投注

又用以上的例子，可能有朋友會問：點解比重一定係（４，３，２，１）姐？　我用（5, 3.5, 1, 0.5)唔得嗎？　搏就搏到可以贏多Ｄ嘛．．．但唔好忘記我地唔係生神仙．．．當然我地想一投注就中．．．但如果開側Ｄ．．．我地可能贏唔到多錢．．．但至少都唔可以輸錢呀．．．若果真係開那條０．５的，就會輸左＄２００了．．．正所謂中三關都要輸錢．．．邊有咁低能架．．．
另一個問題：就係四條都唔中呢？　咁就係賽前分析出的問題了．．．並不是投注的部份出錯。如果係中了那條０．５的而輸錢，就係投注部份出錯，因為冇設立補本投注，盲目追求高回報。

（６）必須：少以搏多　　　避免：以多搏少

這點表面看來好簡單，但就正正好多朋友都會犯的錯。無他的，衰貪心小利而已。三國演義中，曹操曾經評論當時實力俾佢自已強的袁紹，曹操話袁紹：小利就搏晒命．．．大利就畏首畏尾．．．（大致係咁的意思啦）。
有不少人肯用一萬元買曼聯１．５倍的Ｗ，以為贏硬嘛．．．但就算俾你贏了，你咪得５０％的回報？　完全唔值得．．．

（７）必須：本錢要夠　　　避免：算住度住
投資投注乜都好，最緊要是有本錢，這是恆古不變的定律。有關本錢我有兩點的理解：（Ａ）本錢的多少與你的儲蓄有莫大的關係，投注本錢佔你的儲蓄越細越有利。假設你有１０萬的儲蓄，只將１萬拿來做投注本錢，咁相應上心理負擔會冇咁大。另外就算真係輸晒１萬，都仲可以有機會用多１萬來進行另一個計劃。如果一開始就用３萬５萬做本錢，心理負擔會大多，輸晒後進行另一次計劃亦比較難有信心去推行了。
（Ｂ）如果唔夠本錢，算住度住去買，就會好容易錯失一些贏錢的機會，或者係贏得少或者輸埋添；所以我以前提過一些想跟我學買波的朋友，我第一樣叫他們做的係儲錢（當然如果已有積蓄的就唔使啦），跟住叫他們將部份做投注本錢。那些餐搵餐食餐餐清的，我叫佢地唔好去買波的。

（８）必須：訂立目標　　　避免：毫無目標
任何計劃都要有目標的，投注計劃亦唔例外。好多朋友只係希望：贏多Ｄ．．．贏多Ｄ．．．這不是目標，只是一種渴求。要達成一個計劃的目標是有方法、步驟及時間的。以我為例，我２年前用１萬做本錢，目標係在３個月將累積盈餘達到５萬，如果提早達成就再訂立另一目標，不能達成就修訂及檢討。

（９）必須：止蝕預算　　　避免：沒有止蝕
有了本錢，有了目標，到止蝕預算了。我經常都會問自己及朋友，那本錢會打算投注幾多次（日）後，就會輸晒呢（姑且稱為”輸清比率－－－ＬＲＲ”）？　我自己就定為２０。以１萬為例，２０次當會輸晒，故我每次是會投注＄５００的。當然可以選擇ＬＲＲ進取些或保守些。
另外當１萬真係輸晒，咁會否再來一之投注計劃？　我是會的，但我就不會有２次以上的。

（１０）必須：保持注碼　　　避免：注碼飄忽
這點真要詳細分享了。先講注碼飄忽：意思就係唔好按自己的喜惡來加大／縮少每次的注碼。咁係違反了整個投注計劃的。但係在投注計劃內，又係會有每次注碼不同的事呢，以下會詳細說明。

保持注碼的意思，其實應是保持ＬＲＲ。假設投注失利，盈餘少於一萬，每次＄５００的投注是不會縮減的，因為有ＬＲＲ＝２０嘛。但如果盈餘是正數呢？例如去到＄１５０００，咁我的ＬＲＲ又不變（其實我一直以來ＬＲＲ都冇變過），每次的投注就係＄７５０了。盈餘去到＄５００００，每次投注就係＄２５００。雪球是會不停的滾大。

但這會引申到有３個致命的問題／心理障礙：
（Ａ）贏左錢，自然想去花花的，這是人之常情，亦係一件好事呢。但其實贏左就去花左佢，變相在計劃中係少左盈餘的，盈利的增長亦會拖慢。咁就要睇番大家投注的最終目標係乜了。如果你的目標係定時有Ｄ閒錢去花，咁亦無可厚非。但我．．．我的最終目標唔係咁簡單呢，我希望能提早退休，我就會咁唸：咁辛苦做賽前分析都係想可以快Ｄ提早退休．．．所以我就唔會亂花那些盈餘了。我會保持在本錢之中，繼續滾大。
（Ｂ）唔怕得罪講句，相信大部份師兄都未必係大老闆啦．．．每月的人工相信介乎幾千到幾萬掛。當盈餘滾大時，ＬＲＲ又不變，咁其實每一次的投注可能會等如（或超過）你一個月的人工的。每次照計劃去買，可能一次兩次就做到，但次次做就未必得．．．如果加埋有三幾日投注失利，就更加動搖心．．．　咁其實亦都係人之常情。我自己亦遇到過這情況。但我那時會唸：我深信我這套投注策略係掂的嘛。咪所以繼續咯，冇退縮過。另外有朋友都會好驚訝問過我：嘩，你一日買波買成２、３萬咁犀利架．．．我那時冇可能同佢講解我整套投注策略，故我只可以咁答佢：你贏左＄５００，會否介意輸番＄２０or＄３０？　佢話唔介意。　咁我咪話：一樣姐。有五十萬的盈餘，又點會（應）介意輸二、三萬？
（Ｃ）當盈利不停增長時，會不期然會唸多左野的．．．例如心雄的希望買大Ｄ．．．保守的希望守住勝果．．．買細左．．．又會有”割禾青”派，取番部份出來，唔再輸番俾佢．．．又會有增加ＬＲＲ派．．．等等。　我就冇特別對不同的選擇有不同的評論，畢竟每人都不同，我只有提醒大家：你最終的目標係乜先？　你點做都好．．．係咪一個最理想的做法去切合你最終的目標？　　所以我一直以來都只將贏番來的放在本錢之中。

（１１）必須：次次計算　　　避免：追回所失
每次（日）的投注，贏也好輸也好，都算啦。實在不宜分早場夜場。早場贏夜場想追贏多Ｄ都未必係咁壞，因為最多輸番俾佢，當冇玩過而已．．．但就好容易養成一個壞習慣．．．萬一早場輸，就會比較難抑制想在尾場贏番的衝動．．．犯錯的機會就會多了．．．

（１２）必須：詳盡／客觀分析夠　　　避免：福至心靈／投入感情

好多投注足球的人，只會用不多的時間去做賽前分析；正如我的分享之中，賽前分析至少有十四方面要考慮，若果只顧及三四個方面就決定投注，實在冒險。

另外，有不少的朋友有睇開波的，亦有自己喜愛的球隊，或會受「名牌球隊」效應而影響。我個人的看法是：足球只是令到我贏錢的工具，不應投入感情。好像股票般，應該不會對你買的股票有感情掛？　但似乎有不少朋友就係犯了這個「鍾意球隊」或「名牌效應」的錯誤。

（１３）必須：自行研究　　　避免：聽信報紙／他人

做詳細的賽前分析，的確是一件枯燥乏味的事，花的時間又長．．．（我習慣認真度一場波，往往要兩小時．．．）但有一句名言：唔辛苦又點得世間財？辛苦的自行研究完，所得的回報是絕個屬於自己的，沒有任何人可以奪去。有時往往當中了時，是一份成功感大過金錢的回報呢。

現今資訊爆炸，要獲得球彩的資訊太容易，那些在報章／電台／電視等等的所謂名家．．．唉．．．佢地都係一個普通人而已．．．我地又點知道佢地憑什麼而得出結論？　佢地又會否只因為一兩個有利的factor就已建議人買其中一隊？　再者，那些乜乜擂台比賽．．．十個八個所謂名家參加．．．往往只有一兩位能贏錢．．．我地又可以信得誰？　ｄ名家買波掂，就唔係寫報紙做電台啦．．．

引申到另一事，就係自行研究的心得，應否與人分享？　我的態度係否定的。　因為各人有各人買波的方法或態度。一來自行研究的心得是經過辛苦而得來的結論，何須與人分享？　二來俾左人，佢贏左又唔會分ｄ俾自己的；輸左就會怨你．．．結果係永遠都對自己冇好處．．．既然係對自己冇好處的事，點解又要做？

所以小弟覺得世上最冇lun用的人，就係只識問人攞心水／貼士的人，佢地不去自行研究，只想不勞而獲的得到好處。

（１４）必須：敢於出擊　　　避免：畏首畏尾

我最多的投注的是３Ｘ１。其中一關是鐵膽。其餘兩關會買兩瓣。咁當然在選擇買兩瓣的場次之中，自然會選一些賠率高的了（例如：和～３．２及客～３．２）（又例如：和～３．６及客～３．９）。當然絕不會選些賠率低的了（例如：主～１．９及和～３．３）（又例如：主～１．７及和～３．２）。

還記得人有兩個投注的盲點嗎？　（１）冷的唔敢買　（２）輸左想贏番　想贏錢的確要衝破這兩個盲點的．．．所以當經過詳細的賽前分析後，得出結論那場波，賠率高的一隊（即被看淡的一隊），是斷定不會輸的話，買它的兩瓣是有利的。這就是敢於出擊的第一個意義也。

其實一個好簡單的比例計算：好多人可以用幾百，就贏到幾千（姑且當１０倍的利潤啦）。數學上來說，點解又唔可以幾千贏到幾萬？　或者幾萬贏到幾十萬？　又或者幾十萬贏到幾百萬呢？　都係一樣１０倍利潤之嘛？　愚見以為，當盈餘去到一定程度時，又不改變ＬＲＲ的話，故可能每次的投注，不其然會與自己的每月的收入／資產等等作比較的。一有這比較之下，往往會出現不知的畏首畏尾恐懼．．．原按計劃是買＄１００００的，變為買＄５０００，盈利的增長就拖慢了。

為要克服這類的畏首畏尾，而要敢於出擊。我會不斷提醒自己：我深信的我的賽前分析是詳盡的，亦相信自己的投注策略行之有效，我現在的錢亦是從「無」變成現在的盈餘．．．其實又有所足懼呢？

這就是這點的第二個意義。

～～～～～～～～～～～～～～～～～～～～～～～～～～～～～～～～～～

（１５）必須：逐次蠶食　　　避免：孤注一擲

這好似係老生常談，似乎不須太多的講述。其實不是的．．．當人曾經有一定程度的盈餘時．．．但偏偏輸番部份．．．這時候就會陷入其中的一個盲點「輸左想贏番」這點了．．．孤注一擲的行為亦最容易出現。例如盈餘本是有１０萬的，輸輸下變成得７萬，往往這時候就會容易做出「大手投注」的事，因為心理上是會好想贏番「曾經贏過的錢」的．．．

真要避免這種處理呀！！！　始終要用逐次蠶食的方法／心態去做，才會較為理性／合理。

～～～～～～～～～～～～～～～～～～～～～～～～～～～～～～～～～～

（１６）必須：耐心耐性　　　避免：急門求財

無論做賽前分析也好，做賽後檢討也好．．．「時間」是必須的．．．「耐性」亦是必須的．．．贏錢不能一夜富貴，有穩定的盈利增長才是合理／精明的投注策略。所以絕不應以一日兩日的得失，而影響整個投注策略／心理。以半季或一季來做計劃，會是合理的時段。

急門求財當然係死路一條．．．心急想贏錢，絕對會影響心理／判斷。就算可以有一兩次求到急財．．．最後亦容易賠上全部。

～～～～～～～～～～～～～～～～～～～～～～～～～～～～～～～～～～

（１７）必須：記錄投注／賽後檢討　　　避免：忘卻投注／過眼雲煙

好多朋友買馬也好，買波也好，都會花好大比重的時間在做「賽前分析」及球賽進行之中一路睇波。但就可能花極少的時間做賽後檢討。

我的習慣是經常都會做賽後檢討的。當然冇可能當日每一場波都做，但至少自己投注的都要做檢討呀。

當日投注失利時，做賽後檢討可以發掘到自己犯錯的地方，從而不會一切「賴冇運」。　可知究竟是做賽前分析出錯？　還是投注策略出錯？　審視完犯錯的成因後，相信可對下次的投注是有啟發作用的。

我亦習慣會在投注得利時，一樣會做賽後檢討。古語都有講：「勝莫驕」。中正條３Ｘ１，究竟是真的自己眼光獨到？　還是有其他的原因？　不過人是自大的動物．．．當自己有好處時，總習慣會將功勞歸於自己的．．．但我的經驗告訴我，有時贏錢的確是自己眼光好、做賽前分析好。　有時贏錢就真係運氣．．．例如個鐵膽在補時階段才入到波贏１：０，那不是運氣嗎？　如果那隊波能贏，又何需到補時才贏呢？

我自己當遇到上述的情況，會歸納自己為已犯錯的了（雖然賬面上我是贏了錢）。

能做好賽後檢討已是幾難的事（指相對上對於很多投注人來講），但要做得更好，就應做埋「投注記錄」。記錄低一切自己曾投注過的波，我認為會有三個好處：
（Ａ）某程度可以是賽後檢討的參考；
（Ｂ）成為不斷能提醒自己不要犯投注上錯誤的參考；
（Ｃ）當遇到有一段時間失利的境況時，可成為保持信心的助力。

好多朋友買完波，贏就「也文也武」．．．輸就怨天由人、狗吠、話冇運．．．但他們有否反省過自己點解會輸呢？　又會否在下一次投注時犯上同樣的錯誤呢？　自己買左乜野波．．．下星期或下個月就唔記得晒．．．又係咪精明／有效的投注方法呢？

所以我的看法，做賽後檢討及記錄投注，是整個投注策略中，重要的一環，千萬別輕視。

～～～～～～～～～～～～～～～～～～～～～～～～～～～～～～～～～～
～～～～～～～～～～～～～～～～～～～～～～～～～～～～～～～～～～

如何在數十場賽事中，選出３場來作投注？　這正是我之前分享過的FACTORS之中要留意的事項．．．

我的經驗是：要圈定十來場作重點的／詳細的賽前分析，例如師兄熟西甲，咪多Ｄ研究西甲咯．．．熟英冠咪多Ｄ攞英冠研究．．．

這樣，經過一輪研究後，應會得回數場（可能介乎３至８場）是可以正式考慮投注的。這時就要再作更詳盡的研究。

我的投注多是買３Ｘ１，其中一關鐵膽，其餘兩關買兩瓣。

好了，到最後可能出現到可作投注的３場或４場。但亦有可能仍有４至６場是可選擇的．．．咁點呢？

例子：　要選鐵膽（即一定要必勝的），有兩場可以選，兩場的某隊經研究後都有相同的有利FACTOR．．．咁我曾經有五種處理方法。

（Ａ）放棄買３關，改買４關（即兩關鐵膽，其餘兩關要兩辦；）
（Ｂ）放棄既有的３關買法（即第一關鐵膽，第二關要兩瓣；第三關要兩瓣），改為（兩關鐵膽，最後一關要兩瓣）；
（Ｃ）買這兩場賠率高的那一場做鐡膽；
（Ｄ）買兩條３Ｘ１。分別以這兩關做鐵膽；
（Ｅ）買晒（Ａ）（Ｂ）（Ｃ）（Ｄ）的方法；

其實可能有的結果以下：（１）兩場鐡膽都會勝出＜出現率是１／９＞；（２）其中一關鐵膽勝出＜出現率１／３＞；（３）兩場鐡膽都不能勝出＜出現率是４／９＞；

若出現（３）的情況，就絕對是賽前分析出了問題，係咪？一日幾十場波中，找一隊波是必勝的都找不到，仲想贏乜錢？

若出現（１）的情況當然最理想，再附以（Ａ）處理方法就可以得到最高的回報；但不要忘記追求高回報自然風險高；數學上出現率亦最低。

所以，可能（２）的情況最為常見。我地不是生神仙，不是能完全知道賽果的．．．無論你對這兩關鐵膽的分析有多詳盡．．．信心有多強．．．都有可能出現只有其中一隊贏出的．．．故以（Ｃ）的處理有一些可取之處。但不要忘記，若二擇一．．．某程度雖然取決於數字上的運氣，但當你是拿賠率高的那一隊來做鐵膽，回報自然比取賠率低的那一隊可觀的。另外不要忘記另一點是心理，若有以下的情況：

（Ｘ）取賠率高的鐡膽，但不能勝出，賠率低的反而勝出．．．
（Ｙ）取賠率低的鐡膽，但不能勝出，賠率高的反而勝出．．．

你猜（Ｘ）定（Ｙ）．．．你會心理上受傷害多Ｄ？　好明顯是（Ｙ）！
若出現（Ｘ），我最多只會怨自己冇運．．．冇眼光．．．二擇一都擇一個”不中”的．．．會有諸如此類的心理反應。

但出現（Ｙ），除了上述的心理反應外，是會多了一種”若選賠率高的一來可以中，二來可以回報多Ｄ嘛”．．．

（Ｄ）的處理方法，相對上是較為保守／保險的做法。好簡單，若你那天的投注額是＄１０００００，如以（Ａ）或（Ｂ）或（Ｃ）的投注，是會投注全部去一條三關或四關的。

但若以（Ｄ）的投注法，是買兩條三關，每條平均是＄５００００（但我實際上不會平均每條＄５００００的）。若出現（１）的情況，我兩條三關都收錢。若出現（２）的情況，我都有一條三關收錢，足夠補本或有利潤。

點解我不會平均兩條三關都是＄５００００呢？　都是因為回報的考慮。　我的投注策略之中，冷的必定會買多點的，熱的必定買少一點。　所以我傾向會賠率高的鐵膽的三關會買＄６００００或＄７００００。

（Ｅ）的處理我自已不太常用．．．因又複雜．．．回報（或補本）的計算又比較複雜（亦未必理想），所以我只間中採用。

至於要選那些場次，作為其餘兩關的兩瓣來投注，都是用差不多大同小異的方法。

師兄，總之一句，詳細的賽前分析是一切的基礎，小弟的經驗之中，最感困惑之處亦是已分析到二選一或三選一時的決擇．．．．．．希望以上的（Ａ）（Ｂ）（Ｃ）（Ｄ）（Ｅ）等等．．．可以對你有參考之用。