Pantoen Aceh

Sumber Image : google

Bak duk-duk hana but bah loen cuba yu karang panton dile saboh bak rakan loen Mr. Subhan ngon bahasa Aceh. Check it out....

Ie krung lung putu jilee that bagah,
Dalam krung pandrah dara meu upa,
Meuah beu beurayek haba lon peugah,
Meunyoe na salah lon mohon pinta,

Bek jeut keucupa Haba lon unggah,
Neu deungoe beupah bek salah makna,
Bek jeut keupake rakan meutuwah,
Tan na faedah meunyoe meudawa,

Uleu beu mate ranteng bek patah,
Tanyoe bek meugah bak ureung lingka,
Adak hanapeng lam keh bek susah,
Bek tanyoe peugah Hana beulanja,

Bekna soe tupu tungku meutuwah,
Adak tapeugah cit hana cara,
Dak pih geubantu ilme geupeugah,
Cit nyan yang mudah nibak syedara,

Ilme yang geujok boh jok meu geutah,
Han jeut lon arah nyoe tan belanja,
Hanjeut keumodal dengon ie babah,
Ngon peng rupiah baroe samporna,

Umpama pade pucok tengoh crah,
Kuneng oen beukah tanyoe seumula,
Tanna le arti baja taruwah,
Yang na meutamah umu teuh tuha,

Teupriek ngon leuweu baje pih beukah,
Nyoe tan takeubah meusapu hana,
Meunan umpama Haba sipatah,
Bek wate susah baroe tamita,

Aneuk leuk kutru meusu sang beukah,
Teu keujot siwah dicong bak Bangka,
Saket tapeu theun reukung beu basah,
Beutimang lidah tapeugah haba,

Beujeut tahudep oh wate susah,
Ohte tapeugah bek roe ie mata,
Bekweuh lam hate tungku meutuah,
Beujeut tailah tanyoe useuha,

Kasep keuh ohnoe haba lon peugah,
Ka kuweut babah bak kumeurika,
Abeh ngon kupi ruti keukarah,
Timphan pih keumah adak Tan saka,