අපේ ආදී වාසීන් සමඟ ගත කල ඒ සොඳුරු මොහොත.

ඊයේ අපිට අපේ ආදී වාසීන්ගේ වරිගේ මහා ගෙදරට යන්න අවස්ථාවක් ලැබුණ. අපි වරිගේ මහ ගෙදරට යන හන්දියෙන් ඒ පැත්තට හැරෙව්වා විතරයි හොද නාබර කැකුලෙක් නැග්ග කියන්නකෝ අපේ වාහනයට. ඌ නැග්ග වෙලේ ඉදල අපෙන් විස්තර අහල වැදි කවි කීපයකුයි නැවලවිලි කවි කීපයකුත් කියපි. අපි ඉල්ලීමක් කරලා නෙමේ. ඒ කැකුලාගේම කැමැත්තෙන් තමා. මෙන්න බොලේ ඊළගට මූ අපෙන් ආධාර ඉල්ලනවා. රතු කොළ පොජ්ජ, නිල් කොළ පොජ්ජ දෙන්න කියල. ඌ ඉල්ලනෙම කොළ පොජ්ජවල් මිසක් මාරු කාසි නෙමේ. අපේ බස් එකේ කෙනෙක් උගෙන් අහපි දම් කොළ පොජජ්ක් දෙන්නද කියල. මූ හිනැහිලා බොහොම සන්තෝසෙන් එතනට කිට්ටු කරපි. ඉතින් අපේ බස් එකේ කට්ටියත් ඌට හැකි පමණින් ආධාර කලා. අපි ළඟ තිබුන කෑම වර්ගත් අපි ඌට දුන්න. හරිම සන්තෝසෙන් ඒවත් පොදී බැඳගෙන ඌ බස් එක නවත්තපු ගමන් දුවපි ඊළඟ හන්දියට.

ඉතින් අපි බස් එකෙන් බැස්ස විතරයි තව කැකුලෙක් ඇවිත් අපිව වට කරගෙන දේශනයක් දෙන්න හදපි. මේ කැලෑ පොජ්ජේ නොදැන ඇවිදින්න එපා, සතා සිවුපාව හැම තැනම කියල. අපිට තේරුණා ඌ හදන්නෙත් අපෙන් කීයක් හරි කොටා ගන්න කියලා මගපෙන්වන්නෙක් වෙලා කියල. ඉතින් අපි හීන් සැරේ එතැනින් මාරු වුණා.

ඊළඟට අපිට ඕනි උනේ අපේ ආදී වාසින්ගේ නායක ඇත්තෝ හම්බු වෙන්න. ඉතින් අනික් වැදී හුරලගෙන් අහගෙන අපි ගියපි වැදි නායකයාගේ ගෙදරට. අපේ වෙලාවට එතුමා එවෙලේ නිවසේ හිටිය. තවත් කැකුලෙක් අපිට කීව පැලේ ඇතුලට ගිහින් වාඩි වෙන්න කියලා. ඒ ගෙදරට වෙනම පිලක් වගේ කොටසක් තිබුණ. බොහොම පිළිවෙලයි. පාවහන් ගලවල ඇතුලට යනවනම් කැමතියි. සෙල්ෆි ගහනවට කැමති නැහැ ඔන්න ඔය වගේ දැන්වීම් එල්ලලා තිබුණ ඇතුල් වෙණ කෑල්ලේ. ඒක හරිම පිළිවලයි. ආදිවාසි නායක ඇත්තගේ වැදගත් සිදුවීම් වල චායාරුප ගහල ලොකු කල එළියක් කරලා තිබ්බ. අපිත් ගිහින් ඉතින් වාඩි වුණා. නායක ඇත්ත එන තුරු චායාරූප ටිකකුත් ගත්ත.

ටික වෙලාවක් යද්දී නාබර කැකුලෙක් ඇවිත් අපිට ආචාර එහෙම කරලා වාඩි වුණා කියපිකෝ නායක ඇත්තාගේ ස්ථානයේ. අපි දන්නවා ඌ නායක ඇත්ත නෙමේ කියල. ඉතින් අපි ඇහුවා කෝ නායක ඇත්තෝ කියලා, ඇතුල් කෑල්ලේ බෙහෙත් වගයක් හදිනවා කියාපි. අපි කීව අපිට ඒ ඇත්තෝ මුණ ගැහෙන්න මනාපයි කියල. ඒ කියනකොටම ඒ ඇත්තෝ ඇවිත් අපිට ආචාර කරලා මේ මගේ පුතා එයත් එක්ක කතා දමන්නෙයි කියල යන්න හදපි. මම දුවල නායක ඇත්තට කීව අපි ආවේ ඔබ තුමා හම්බවෙන්නයි අපිට ෆොටෝ එකක් ගන්න අවසර දෙනවද කියල. මෙන්න හිනාවෙලා ඔළුව වනපි. මම ෆොටෝ කීපයක් ගහ ගත්තට පස්සේ එතුමා ඇතුල් කෑල්ලට වැදුන. අනෙක් ආපු කට්ටිය නාබර කැකුලත් එක්ක කතා දමද්දී අපි පිට වුණා වැදී කොරහ නටනවා බලන්න යන්න.

කතාව දිගයි වගේ. ඉතින් මම ඉතිරි පොජ්ජ ඔය ඇත්තන්ට කියවන්න හෙට පල කරන්නම්කො. ඉතින් එතෙක් සමු ගන්නම්.

ස්තුතියි.