Share Your Message on the Vesak Poya Day | 10% For SL-Charity

ආයු බොහෝ වේවා මගේ යාළුවෝ හැමෝටම!!!

වෙසක් !! මම අවුරුදේ මාස දොළහෙන් වැඩිපුරම ගත කරන්න ආස මාසෙ තමයි මැයි එහෙම නැත්තම් වෙසක් මාසේ කියන්නේ. වෙසක් මාසෙට කවුද අකමැති කියලා ඔයාලා මගෙන් අහයි...😌 ඔව්. වෙසක් කාලෙට කවුද අකමැති. එක පැත්තකින් මට වෙසක් කියලා කියන්නේ, වයස් භේදයකින් තොරව අපි හැමෝගෙම ඇතුලාන්තයේ සැගවිලා ඉන්න ළමා චරිතය එලියට එන කාලයක්.

මේ පාර වෙසක් සමරන්න අපිත් එක්ක අපේ මාමගේ පුතා, දයානුත් හිටියා. වෙනදට වෙසක් කූඩු දෙකකින් හැඩ වෙන අපේ ගෙදර මෙදා පාර වෙසක් කූඩු පහකින් හැඩ වුණේ දයාන් මල්ලි නිසා.තිත්ත වුනත් ඇත්ත කතාව, මට තාම අටපට්ටම් වෙසක් කූඩුවක් හරියට ඇද නැතුව හදා ගන්න බැහැ. හැබැයි මම නිකන් හිටියෙත් නෑ. මල්ලිලා ලස්සනට කූඩු හදද්දි මාත් හැදුවා ටිකක් විතර ඇද වුණ අටපට්ටම් කූඩුවක්. කමක් නෑ ඉතින්. එහෙම හරි හැදුවනේ. ඔක්කොම කූඩු පහයි.

පොඩි කාලේ ඉදන් මම වෙසක් කූඩු දකින්න ආස කරන විදියක් තියෙනවා. මම ගොඩක් කැමතියි වෙසක් කූඩුවක් තනිකර සුදු පාටින් හැඩ වෙනව නම්. ඉතින් හැම පාරම අපේ ගෙදර වෙසක් කූඩු හැඩ වුණේ තනිකරම සුදු පාටින්. ඒත් මල්ලි කැමති පාට පාටින් වෙසක් කූඩු සරසන්න. ඉතින් එයාගේ ගෙදර පාට පාට වෙසක් කූඩු. අපේ ගෙදර කිරි සුදු පාට වෙසක් කූඩු.

වෙසක් කූඩු වලට අමතරව මම හැම පාරකම වගේ තැඹිලි පාටයි, තැඹිලි පාටට හුරු කහ පාටයි A4 කොල වලින් වෙසක් බකට් හැදුවා. ඉතින් මේ පාරත් මම ඒ වගේ බකට් දහයක්ම හැදුවා. මැටි පහන් දහයක් අරන් ඒවට ඉටි පන්දම් පත්තු කරලා සවි කරලා බකට් එක ඇතුලෙන් මැටි පහන තිබ්බම එන එළිය දකින්න තමයි මම කැමති.

ගමේ පන්සල නම් හරිම පාලුයි. ඒත් වෙනදා වගේම පන්සල සමරන්න ලොකු හාමුදුරුවෝ අමතක කරලා තිබුණේ නෑ. පන්සලේ පාලු ගතිය නැති කරලා සුළු වෙලාවක් පන්සලේ ගත කරන්න මාත් අමතක කරේ නෑ.

^{යාලුවොන්ගේ ප්‍රතිචාර කීපයක්}

මෙදා පාර වෙසක් එකට මම පුංචි වෙනස් දෙයක් කලා. ගෙදරටම වෙලා ඉන්න නිසා මම හිතුවා ඒ වගේ දෙයක් කලොත් හොදයි කියලා. මම මගේ කලින් ලිපිය වෙන් කලේ මගේ වෙසක් සුභ පැතුම් පත් එකතුව වෙනුවෙන්. ඉතින් කිව්වා වගේම වෙසක් දවසේ උදේ පාන්දර මම මගේ යාලුවො මට පුංචි කාලේ දුන්න වෙසක් කාඩ් වල ෆොටෝ ගහලා මට සම්බන්ධ කර ගන්න පුළුවන් හැම යාලුවෙක්ටම යැව්වා.

යාලුවොන්ගෙන් ලැබුණු ප්‍රතිචාර දැක්කම මට හිතුණා මම කරේ මොන තරම් වටින දෙයක්ද කියලා. ඒ හැමෝම ගොඩක් සතුටු වෙලා තිබුණා එයාලගේ අත් අකුරින් ලියපු වෙසක් කාඩ් දැකලා. ඒත් එක්කම තව විශේෂ දෙයක් මට මෙදා පාර වෙසක් එකට අත්විඳින්න පුළුවන් වුණා. මට කිව්වාට ස්ටීම් ශ්‍රී ලංකා අපි හැමෝටම. ඒ තමයි අපි හැමෝගෙම යාළුවා @alejos7ven අපේ වෙසක් ගැන ලියලා දාපු ලිපිය. දුර ඈත රටක ඉන්න කෙනෙක් අපේ වෙසක් ගැන ලියලා තියෙනවා කියන එක අමුතු සතුටක්. ඉතින් විස්සයි විසිඑකේ වෙසක් මට නම් අමතක නොවන වෙසක් සැමරුමක්.

තවත් අතකින් මට දැනෙන විදියට වෙසක් කියන්නේ ජීවිත පාඩමක්. මට ඒක මේ පාර ගොඩක්ම තේරුම් ගියා. මල්ලිලා වෙසක් කූඩු හදලා දුන්නට මොකද ඔක්කොම ඇලෙව්වේ මම. එක තැනක ගොඩක් වෙලා රැදිලා ඉන්නවා කියන එක මට හරිම අමාරු දෙයක්. වෙසක් පෝයට කලින් දවසේ මේ ඔක්කොම වැඩ දා ගත්ත නිසා මට විවේකයක් ගන්න වෙලාවක් තිබුණේ නෑ. වෙසක් කූඩුවක් ආවට ගියාට අලවන්නත් බෑ. ඉතින් ඒ අත්දැකීම ඔයාලටත් ඇති කියලා හිතනවා. එහෙම හදපු වෙසක් කූඩු , බකට් අහම්බෙන් හෝ ඉටි පන්දම් දැල්ලකට හසු වෙලා දැවිලා අලු වෙලා යන්න ගත වෙන්නේ තත්පර කීපයයි. එතනදි අපිට ඉවසීම, දරා ගැනීම වගේම හැම දේකම පවතින අස්තීරත්වය වගේ ජීවතයට අත්‍යාවශ්‍ය පාඩම් රැසක් කියලා දෙනවා.

පෘතක්ජන අපි හරි ඉක්මනින් මතුපිටින් දකින දේ වැළඳගන්නවා. ඒත් අපි උසස් මනසක් තියෙන සත්ත්වයින් විදියට සෑම දෙයක්ම අර්ථවත් ලෙස අවබෝධ කර ගත යුතුයි. ගැඹුරින් හිතලා බැලුවොත් මට දැනෙන විදියට වෙසක් කියන්නේ සොබාදහම. ඇයි මම එහෙම කිව්වේ? සිදුහත් උපත සිදු වුණේ ලුම්බිණි සල් උයනේදී. සිදුහත් තවුසානන් බුද්ධත්වටය පත් වූයේ ඇසතු බෝධී වෘක්ෂ මූලයෙහිදී. බුදුන් වහන්සේ පරිණිර්වානය සඳහා තොර ගනුලබන්නේ කුසිනාරාවේ වන උද්‍යානයක්. ටිකක් හිතන්නකෝ. අසිරිමත් තෙමගුලම මොන තරම් සොබාදහමට කිට්ටුද??? මම හිතන්නේ අපි තේරුම් ගත යුත්තේ එයයි.

ඉතින් යාලුවනේ, වෙසක් කියන්නේ සොබාදහම නොවෙයිද?? බුදුන්වහන්සේ අපිට කියාදෙන වෙසඟේ නියම අර්ථය එය විය නොහැකිද???? අපි සොබාදහම අමතක කිරීමේ විපාක අද අපි භුක්ති විඳිනවා. ඉතින් වර්තමානයේ සමාජයේ පවතින වසංගත තතවයත් එක්ක මට සමාජෙට දෙන්න තියෙන පණිවිඩය තමයි, සොබාදහම කියන දේ අමතක කරන්න එපා. සොබාදහමට ආදරය කරන්න. කළගුණ සලකන්න. හැමදාටම. ව්‍යසන බොහෝමයකට සරල පිළිතුර එයයි.

මම ඕනවටත් වඩා ලිව්වද කියලා හිතෙනවා මට. ඒත් පුරුදු නැති ඉංග්‍රීසියට වඩා පුරුදු සිංහල ඇතුලේ දැනෙන නිදහස අනන්තයි. මම ගොඩක් ස්තූති වන්ත වෙන්වා @damithudaya මේ තරඟය සංවිධානය කිරීම පිළිබදව. ඒ වගේම මම හිතුවා වෙනදා වගේ පින්තූර වලින් ලිපිය හැඩ කරන්නේ නැතුව ඒ ඔක්කොම දාලා හදපු පුංචි වීඩියෝ එකක් හැදුවොත් හොද වෙනසක් වෙයි කියලා. ඉතින් , මගේ යාළුවෝ හැමෝම පරිස්සමින් ඉන්න.

ස්තූතියි!
-සඳුපි-
❤️