ඉක්කා ගහන ඉස්කෝලෙ නෝනා | Hichki

මම අද කියන්න යන්නේ මේ ලඟදි මම නරඹපු ලස්සන හින්දි චිත්‍රපටයක් ගැන. ඒ Hichki. සිංහලෙන් කියනව නම් ඉක්ක ගහන ඉස්කෝලේ නෝනා. මම මේ චිත්‍රපටිය බැලුවේ jsb group එකෙන්. හරි අපූරු කතාවක්. මුලින් චුට්ටක් හිනා ගියාට චිත්‍රපටය අවසානයේ දී නං ඇස් වලට කඳුළු එනවමයි.

jsb film
මේ චිත්‍රපටයේ ප්‍රධාන චරිතය වෙන්නේ naina mathur කියන ගුරුවරිය. මේ චරිතයට පණ පොවන්නේ හින්දි සිනමාවේ දක්ෂම නිළියක් වන රාණි මුකර්ජි. මම පෞද්ගලිකවත් ගොඩක් කැමතිම දක්ෂ නිලියක්. මේ ගුරුවරිය පුංචි කාලයේ ඉඳලා ස්නායු ආබාධයකින් පෙළෙනවා.එහි ප්‍රතිඵලයක් විදියට ඇයට නවත්වාගත නොහැකි පරිදි විශාල ශබ්දයක් නගමින් ඇයට ඉක්කාවක් ඇතිවෙනවා. මේ හේතුව නිසා ඇය පුංචි කාලයේ දී ගොඩක් දුක් විඳිනවා. මොකද ඇයගේ මේ ශබ්දය නිසා පාසලේ ඉගෙන ගන්නා අනෙක් ළමයින්ට කරදරයි කියලා ඇය යන යන පාසලෙන් ඇයව ඉවත් කරනවා. ඒ වගේම ඇයත් සමග ඉන්න විට ඇගේ ඒ ශබ්දය නිසා ඇතිවන ලැජ්ජාව හේතුවෙන් ඇගේ පියා ඔවුන්ව අතහැර යනවා. නමුත් හැම වෙලාවෙම නෛනගෙ අම්මත් සහෝදරයත් ඇය සමග ම ඉන්නවා.

කාලයක් යනකොට නෛනා කියන්නේ වෘත්තීය සුදුසුකම් වලින් උපරිම ස්ථානයක ඉන්න කෙනෙක්.ඇය හොයන්නේ ගුරුවෘත්තියට පිවිසෙන්න. නමුත් ඇගේ මේ ඉක්කාව නිසා ඇයට ඒ වගේ ලැබුණු අවස්ථා රැසක් ගිලිහෙනවා. අවසානයේ ඇයට නොට්ස්කර්ස් ස්කූල් කියන පාසලෙන් අහම්බෙන් වගේ ගුරුවරියක් විදිහට සේවය කරන්න අවස්ථාව ලැබෙනවා. ඇය මේ අවස්ථාවක් පිළිගන්නේ බොහොම සතුටින්.

නමුත් ඒ ලැබුණු අවස්ථාව එතරම් සොඳුරු අත්දැකීමක් නම් නෙවෙයි. මොකද ඇයට ලැබෙන්නේ පාසලේ නමය ශ්‍රේණියේ තියෙන දුර්වලම වගේම දඟකාර ම ළමයි ඉන්න පන්තිය. පන්තියේ විශේෂත්වය තමයි මේ පන්තියේ ඉන්න සියලුම දෙනා මුඩුක්කුවල ඉන්න දරුවන් පිරිසක්. ඒ දරුවන් ඉගෙන ගැනීමට වඩා මුල් තැන දෙන්නේ කීයක් හරි හම්බකරගෙන ජීවිතය ගැට ගසා ගන්න. පාසලේ අනිත් සියළුම ළමුන් පොහොසත් පවුල්වල ළමුන්. මේ නිසා සෑම විටම 9F පන්තියේ ළමයින් පාසලේ විතරක් නෙමෙයි සමාජයෙන්ද කොන් වුණා. මේ පන්තිය භාරව මාස හතක් ඇතුළත ගුරුවරුන් හත් දෙනෙක් ඉඳලා තියෙනවා. නෛනා කියන්නේ අටවෙනි ගුරුවරිය. පන්තියේ ළමයින්ගේ දඟකාරකම් සහ දඩබ්බර කටයුතු නිසා ඒ පන්තිය භාර ගන්න ආපු හැම ගුරුවරයෙක්ම ඒ පන්තිය අත්හැර ගිහින්.

ඉගැන්වීම් කටයුතු කරන්න ඇය පුළුවන් තරම් උත්සාහ කරත් ඇයට පාසලෙන් එතරම් ලොකු සහයෝගයක් ලැබෙන්නේ නැහැ. නමුත් ඇය කොහොමද ඇගේ ස්ව උත්සාහයෙන් මේ ළමයි ටික ගොඩ දාන්න උත්සාහ කරන්නෙ කියන එක මුලු කතාව පුරාවටම හරිම ලස්සනට වගේම හරිම සංවේදී විදියට පෙන්වනවා.

ඇය නිතරම කියන දෙයක් තිබුණා. "නරක ශිෂ්‍යයෝ කියලා කොටසක් නැහැ.ඉන්නේ නරක ගුරුවරු පමණයි" හිතන්න ගොඩක් දේවල් ඒ වාක්‍ය තුළ ගැබ්වෙලා තියෙනවා කියලා මට හිතෙනවා. අපි පාසලකට ගියහම දඟකාර ළමයි ඉන්න පන්තියකදී ගුරුවරු කියනවා ඇහෙන්නේ "මට හම්බුන නරකම පන්තිය මේක" කියලා. ඉතින් ඒ ගුරුවරු හිතුවද කවදහරි මේ පන්තිය පාසලේ තියෙන හොඳම පන්තිය කරන්න පුළුවන් කියලා? නෑ නේද.? ගොඩක් ගුරුවරු කරන්නේ දක්ෂ ළමයට උගන්වන එක.මොකද ඒක හරි ලේසියි. හැබැයි දුර්වල ළමයෙකුට පුංචි හරි දෙයක් උගන්වන එක ගොඩක් අමාරුයි.

මේ චිත්‍රපටිය පුරාවටම නෛනා කියන ගුරුවරිය කිසිම දෙයක් දන්නෙ නැති දුර්වල ළමයි ඉන්න පන්තියක දක්ෂ ළමයි පිරිසක් බිහි කරන විදිය හරි ලස්සනට කියලා දෙනවා. ඒ වගේම පාසලේ දී ලැබෙන විවිධ අත්දැකීම් වලට කොහොමද මුහුණ දෙන්න කියලත් ඇය හොඳින් කියලා දෙනවා.

ඉතින් චිත්‍රපටිය අවසාන වෙනකොට ඇයගේ ඒ කැපවීමට ඒ උත්සාහයට එය ආදරණීය බවට හොඳම පිළිතුර මේ දඩබ්බර ළමයි ටික ලබා දෙනවා. ඇත්තටම ඒ අවසානය හරිම සංවේදී. අහම්බෙන් ලැබුණු ගුරුවෘත්තිය තුළින් උපරිමය දක්වා සේවයක් කරලා ඇය අන්තිමට මේ පාසලේ විදුහල්පතිනිය විදියට පාසලෙන් විශ්‍රාම ගන්නවා.

කාලෙකට පස්සේ හිතට දැනෙනවා අපූරුම ලස්සනම චිත්‍රපටයක් තමයි Hichki කියන්නේ. විඳින්න දෙයක් විතරක් නෙමෙයි හිතන්න ගොඩක් දේවල් ඒ චිත්‍රපටිය මගේ ජීවිතේට එකතු කළා. ඉඩ තියෙන වෙලාවක ඔයත් මේ චිත්‍රපටිය බලන්න. ඔයාටත් හිතන්න ගොඩක් දේවල් වගේම පාසල් කාලේ ඔයාට ලැබුණු අපූරු අත්දැකීම් ගොඩක් ආයෙමත් ලස්සනට මතක් වේවි.