අඳුර

අන්තිම පන්දුවෙන් ජය පරාජය තීරණය වෙන ක්‍රිකට් මැච් එකක් බැලුවම කවුරු දිනුවත් හිතට අමුතුම සතුටක් දැනෙනවනෙ. ඒ වගේ අවසානෙ වෙනකම්ම මොකද්ද වෙන්නෙ කියල හිතාගන්න බැරි ෆිල්ම් වගේම හිතනවට වඩා බොහොම වෙනස් අවසානයක් තියෙන ෆිල්ම් බලන්න මං ආසයි.

ඉස්සර කැම්පස් එකේ ඉද්දි කට්ටියත් එක්ක එකතු වෙලා දවසකට එක ෆිල්ම් එකක් හරි අනිවාර්යයෙන්ම බැලුවට දැන් නම් ෆිල්ම් බලනව හරි අඩුයි. අනිත් එක තමයි මං ඇඳේ ඉඳන් ෆිල්ම් බලන්න තමයි පුරුදු වෙලා ඉන්නෙ. ඉතින් ගොඩක් වෙලාවට නොදැනිම නිදිමත එනව.

කොහොම උනත් හොඳ මලයාලම් ෆිල්ම් එකක් හම්බුනොත් ඉවර වෙනකම්ම බලනවමයි. මොකද ඒ ෆිල්ම් එකකට එකක් වෙනස් වගේම හරිම අමුතු ලස්සනක් තියෙනව. මට නම් ඒ නළු නිළියො රඟපානව කියල හිතෙන්නෙත් නැහැ.ඒ තරම් තාත්විකයි.

ඉතින් ඊයෙ රෑ හොඳටම වැස්ස. ෆිල්ම් එකක් බලන්නම ඕනි කියල හිතුණ. හොයාගෙන හොයාගෙන යද්දි එක ෆිල්ම් එකක ෆහාද් ෆසිල්ගෙ මූණ දැක්ක. එයා ඉන්නව කියන්නෙ ඒ ෆිල්ම් එක ගැන අමුතුවෙන් කියන්න ඕනි නෑ මට නම්. ෆිල්ම් එකේ නම Irul(2021).

Source

ඉතින් මේ ෆිල්ම් එකේ චරිත තුනක් විතරයි ඉන්නෙ. එහෙමයි කියල ෆිල්ම් එකට කිසිම අඩුපාඩුවක් වෙලා නෑ. ෆහාද් ෆසිල්ගෙ ගුප්ත හැඟීම් සහිත මූණ, සෞබින් සහීර්ගෙ වින්දිතයෙකුගෙ හැඟීම් අපූරුවට නගාගන්න පුලුවන් මූණ වගේම දර්ශනා රාජේන්ද්‍රන්ගෙ කිසිවක් හිතාගන්න බැරිව අසරණ වුනු මූණ මේ කතාවට හරිම සාධාරණයක් ඉෂ්ට කරනව. ඔව්.. එයාල මූණෙ හැඟීම් වලින් ලොකු වැඩක් කරනව.

Sorce

Source

කෲර විදිහට වධ වේදනා දීල කාන්තාවන් ඝාතනය කරපු බිහිසුණු දාම ඝාතකයෙක් ගැන Irul (අඳුර) කියල පොතක් ලියපු ලේඛකයෙක් සහ ඔහු සමග දළුලා වැඩෙන සම්බන්ධතාවක් ඇති කනිෂ්ඨ නීතිඥවරියක් කාර්‍යබහුල ජීවිතෙන් මිදිල ඈත කඳුකර පළාතක නිවාඩුවක් ගත කරන්න යන ගමනෙදි මහා වැස්සක් මැද ඔවුන්ගෙ මෝටර් රථය ක්‍රියා විරහිත වෙනව. ඒ අසළ තිබුණු විසල් නිවසක ඔවුන්ට දොර හරින ආගන්තුකයෙක් සමග ඇතිවන සිදුවීම් පෙළක් මත තමයි මේ ෆිල්ම් එක දිව යන්නෙ. මට කතාවම ලියන්න හිතුණත් මං ලියන්නෑ. මොකද ඒ ෆිල්ම් එක බැලුවම එන හැඟීම් මං ලියන එක කියෙව්වට ඔයාලට එන එකක් නෑ.

මේ ෆිල්ම් එකේ පසුබිම් සංගීතය සහ දර්ශන තලය මට නම් බොහොම හිතට වැදුණ. කතාවට නියමටම ගැළපුණා කිව්වොත් හරි. ඒ තුන් දෙනා මුණ ගැහිල අර ලේඛකයගෙ පොත ගැන කතා කරපු ටික නම් වේදිකා නාට්‍යයක් බැලුව වගේ. එකම වීඩියෝ ෂොට් එකකින් අරන් තිබුණෙ. කතාව මියුසික් එක්ක එකතු වෙලා චුට්ටක් බය හිතුණත් ඒක බලපු එක ගැන නම් මට සතුටුයි. වෙලාවක් තිබුණොත් හොයාගෙන බලන්න. වැස්ස වෙලාවක ලයිට් එහෙම ඕෆ් කරල බලද්දි තවත් හොඳයි.